काठमाडौं । अखिल नेपाल फुटबल संघ (एन्फा)ले फागुन १८ गतेदेखि सुरु हुने साफ यू–१६ महिला च्याम्पियनसिपको तयारी पूरा भएको जनाएको छ । बुधबार काठमाडौंमा पत्रकार सम्मेलन गर्दै एन्फाले एक्षिण एसियाली फुटबल महासंघको क्यालेन्डरअनुसार फागुन १८ देखि २७ गतेसम्म हुने प्रतियोगिताको तयारी पूरा भएको जनाएको हो ।
प्रतियोगिताका लागि २३ सदस्यीय नेपाली राष्ट्रिय यू–१६ महिला टोली प्रशिक्षक चक्र तामाङको प्रशिक्षणमा छन् भने प्रतियोगितामा सहभागी हुन भारत, भुटान र बंगलादेशको टिम नेपाल आइसकेका छन् ।
प्रतियोगिताको टिकट दर साधारण पाराफिटतर्फ १०० र भीआईपी प्याराफिटतर्फ ३०० रुपैयाँ कायम गरिएको एन्फा प्रवक्ता सुरेश शाहले जानकारी दिए । प्रतियागिताको अनुमानित बजेट दुई करोड १२ लाख २० हजार ९०० रुपैयाँ रहेको उनले बताए । बजेट एक्षिण एसियाली फुटबल महासंघबाटै प्राप्त भएको उनले जानकारी दिए ।
नेपालले आफ्नो पहिलो खेल फागुन १९ गते बंगलादेशसँग खेल्नेछ भने दोस्रो खेल फागुन २१ गते भुटानसँग खेल्नेछ । लिग चरणको अन्तिम खेल नेपालले फागुन २४ गते भारतसँग खेल्ने छ । शीर्ष दुई टोलीले उपाधिका लागि प्रतिस्पर्धा गर्ने छन् । सबै खेल एन्फा कम्प्लेक्स सातदोबाटोमा हुनेछन् ।
