काठमाडौं । प्रतिनिधि सभाको सार्वजनिक लेखा समितिको मंगलबारको बैठकमा एउटा दुर्लभ दृश्य देखियो ।
दुर्लभ यसअर्थमा– अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले जुन भ्रष्टाचार प्रकरणमा अनुसन्धान भइरहेको छ भन्दै उपलब्धि सुनाउँदै थिए, त्यस प्रकरणका आरोपी सोही बैठकमा उपस्थित थिए ।
ती व्यक्ति सुन्ने हैसियतमा होइन, अख्तियार प्रमुखलाई प्रश्न सोध्ने हैसियतमै उपस्थित थिए । ती हुन् नेकपा एमालेका सांसद, सार्वजनिक लेखा समिति सस्दय तथा पूर्व सञ्चार तथा सूचना प्रविधि मन्त्री गोकुलप्रसाद बास्कोटा ।
लेखा समितिले अख्तियारका प्रमुख आयुक्त राईलाई समितिले दिएका आदेश के कति कार्यान्वयन भए र तिनको अवस्था के छ भन्ने बारेमा जानकारी लिन मंगलबारको बैठकमा बोलाएको थियो ।
बैठकमा अख्तियारले गरेका कार्यका बारेमा जानकारी दिने क्रममा अख्तियारका प्रमुख आयुक्त राईले भने, “सेक्युरिटी प्रेस टेप काण्डको अनुसन्धान भइरहेको छ ।”
प्रेम राईले टेप काण्ड उच्चारण गरेपछि केही पर बसेका बास्कोटाले राईलाई एक टकले हेरिरहे । लेखा समितिका केही सदस्य भने उक्त समयमा आफ्नो टाउको बास्कोटातर्फ मोडिरहेका थिए । बास्कोटाले पनि राईबाट विस्तारै आँखा दाया–बायाँ डुलाए अनि टेबलमा रहेको कागज पढेझैँ गरे ।
‘टेप काण्ड’ त्यो घटना थियो जसका कारण बास्कोटाले सञ्चार तथा सूचना प्रविधि मन्त्रीबाट राजीनामा दिनु परेको थियो ।
सेक्युरिटी प्रेस खरिद प्रक्रिया अघि बढाउने क्रममा मन्त्रीको जिम्मेवारी सम्हालिरहेका बास्कोटाले बिचौलियासँग ७० करोड कमिसन लेनदेन सम्बन्धी गरेको कुराकानीको टेप रेकर्ड २०७६ फागुनमा सार्वजनिक भएको थियो । त्यसपछि उनले मन्त्रीबाट राजीनामा गर्नु परेको थियो ।
सोही घटनाको छानबिन अघि बढाउन लेखा समितिले अख्तियारलाई भनेको थियो । घटना भएको चार वर्षपछि लेखा समितिमा अख्तियारका प्रमुख आयुक्तले नै ७० करोड टेप प्रकरण उठाएका थिए । “अनुसन्धान भइरहेको छ । प्रमाण नभेटिएकोले दोषी कसैलाई भन्न भएन,” अख्तियारका प्रमुख आयुक्त राईले लेखा समितिको बैठकमा भने । उनले यो प्रकरणलाई छिट्टै टुङ्गोमा पुर्याउने आश्वासन दिए ।
अख्तियारका प्रमुख आयुक्त राईले टेप काण्डबारे थोरैमात्र बताए तर त्यसबारे थप जान्ने इच्छा लेखा समितिका कुनै सदस्यले व्यक्त गरेनन् । बास्कोटा स्वयमले पनि उक्त विषयमा केही बोलेनन् । उनले अन्य विषयमा अख्तियारलाई सुझावमात्रै दिए ।
बैठक चलिरहँदा बास्कोटा नभएको बेला लेखा समितिका सदस्य अर्जुन नरसिंह केसीले एकपटक मात्र सेक्युरिटी प्रेसको नाम उच्चारण गरेका थिए । उनले सेक्युरिटी प्रेसको नाम उच्चारण गरिरहँदा बास्कोटा बैठकमा कक्षमा प्रवेश गरेका थिए । त्यसपछि केसीले सेक्युरिटी प्रेसको नाम दोहोर्याएनन् ।
समितिको बैठकमा आफ्नै सदस्यको नाम जोडिएको काण्डका विषयमा अख्तियारका प्रमुख आयुक्तले अनुसन्धान भइरहेको जनाउँदा उक्त काण्डका विषयमा सबै सदस्य मौन देखिएका थिए ।
सदस्यहरुले अन्य काण्ड र प्रकरणका नाम बारम्बार दोहोर्याउँदा ७० करोडको टेप काण्डका विषयमा भने सहमति नै गरेझै मौन बसेका थिए । बास्कोटा भने बैठकको आधा समयतिर निस्केर हिँडेका थिए । त्यसपछि उनी बैठकमा आएनन् ।
-1706524096.JPG)
