काठमाडौं । नेपाल स्रष्टा समाजको सञ्चालन तथा व्यवस्थापन रहने गरी ‘रेखा–पवन स्रष्टा सम्मान’को स्थापना गरिएको छ । जसमा सम्मान पत्रसहित नगद राशि एक लाख १११ रुपैयाँ प्रदान गरिने छ ।
साहित्यकार पवन आलोक र उनकी धर्मपत्नी रेखा कँडेलका नाममा छोराछोरी विमला कँडेल, रीता कँडेल, सुनील कँडेल, अनिता कँडेल र बुहारी माला कटुवाल कँडेलद्वारा स्थापित उक्त सम्मानको सञ्चालनका लागि हाललाई १५ लाख रुपैयाँको अक्षय कोषको व्यवस्था गरिएको छ ।
सोमबार अनामनगरमा आयोजित पत्रकार सम्मेलनमा साहित्यकार आलोककी छोरी रीता कँडेलले आफूहरूले राष्ट्रिय वाणिज्य बैंकमा अक्षय कोषको स्थापना गरेको जानकारी दिँदै सम्मानको सम्पूर्ण व्यवस्थापन र सञ्चालन स्रष्टा समाजमा निहित रहने बताइन् । उनले यो सम्मान आउँदो वर्ष २०८१ को फागुन २४ गतेदेखि समर्पण गरिने जानकारी पनि दिइन् ।
उक्त अवसरमा वरिष्ठ साहित्यिक पत्रकार नगेन्द्रराज शर्माले ‘रेखा–पवन स्रष्टा सम्मान’ पवित्र सम्मानका रूपमा स्थापित हुने विश्वास व्यक्त गर्दै आशीर्वचन दिए ।
समाजका अध्यक्ष श्रीओम श्रेष्ठ रोदनले ‘रेखा–पवन स्रष्टा सम्मान’ गरिमापूर्ण हुने जानकारी गराउँदै सम्मान विवादरहित रूपमा स्थापित हुने विश्वास दिलाए । सम्मान तथा पुरस्कारमा मौलाएको विकृति र सट्टापट्टा प्रवृत्तिबाट समाजका सम्मान तथा पुरस्कारहरू टाढै रहेको बताउँदै स्थापित सम्मान साहित्यमा कम्तिमा चार दशकको योगदान दिने व्यक्तित्वलाई प्रदान गरिने जानकारी दिए । यससम्बन्धी कार्यविधि छिट्टै निर्माण गरिने पनि उनले बताए ।
समाजका निवर्तमान अध्यक्ष साहित्यकार विधान आचार्यले पवन आलोकको साहित्यिक क्रियाशीलताको चर्चा गरे । पत्रकार सम्मेलनमा प्रा.डा. लक्ष्मणप्रसाद गौतम र चेतनाथ कँडेलले पनि बोलेका थिए ।
