काठमाडौं । ओपनर कुशल भुर्तेलको अर्धशतकप्रेरित नेपालले आईसीसी क्रिकेट विश्वकप लिग–२ मा नेदरल्यान्ड्ससामु १७३ रनको लक्ष्य प्रस्तुत गरेको छ । आइतबार कीर्तिपुरस्थित त्रिवि क्रिकेट मैदानमा टस हारेर ब्याटिङमा उत्रिएको नेपालले ४९.३ ओभरमा सबै विकेट गुमाएर १७२ रन बनायो ।

नेदरल्यान्ड्सविरुद्ध ब्याटिङमा संघर्ष गरेको नेपालबाट ओपनर कुशल भुर्तेलले ६६ रन बनाए । क्रिजको एक एन्डबाट लगातार विकेट जाँदा अर्कोमा टिकेका भुर्तेलले धैर्यपूर्ण ब्याटिङ गर्दै ९३ बलमा आठ चौका प्रहार गरे । एकदिवसीय अन्तर्राष्ट्रिय क्रिकेटमा भुर्तेलको यो आठौँ अर्धशतक हो ।

आसिफ शेखसँग ओपनिङ ब्याटिङमा आएका भुर्तेल सातौँ विकेटका रूपमा आउट भएका थिए । पहिलो विकेटका निम्ति शेखसँग ८.३ ओभरमा ४२ रनको साझेदारी गर्दै नेपाललाई राम्रो सुरुआत दिलाएका थिए । तर, यसपछिका ब्याटर खुलेर खेल्न नसक्दा नेपाली टिम ठूलो योगफलसम्म पुग्न सकेन ।

नेपालको स्कोरबोर्डमा आसिफले २७ बलमा दुई चौका र एक छक्कासहित १७ रन थपे ।

शीर्ष र मध्यक्रम ‘फ्लप’ भए पनि अन्तिममा आरिफ शेख र करण केसीले नवौँ विकेटका निम्ति ३६ रनको साझेदारी गरेपछि नेपाल सम्मानजनक योगफलसम्म पुगेको हो । ५० बल खेलेका आरिफले एक चौकासहित २२ रन बनाए । करणले २७ बलमा एक चौका र दुई छक्कासहित २६ रन थपे । कप्तान रोहितकुमार पौडेलले १६ रन जोडे । अरू ब्याटरले दोहोरो अंकमा रन बनाउन सकेनन् ।

नेदरल्यान्ड्सका भिभियन किंग्मा र आर्यन दत्तले समान तीन विकेट लिए । बास डे लिडेले दुई र रोइलोफ भान डेर मेर्वेले एक विकेट लिए ।