काठमाडौं । राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानबहादुर शाहीले आफूले किन राजीनामा दिने भन्दै प्रश्न गरेका छन् । आइतबार प्रतिनिधिसभा बैठकको विशेष समयमा उनले यस्तो प्रश्न गरेका हुन् ।

उनीभन्दा अघि बोलेका सत्तारूढ दल नेकपा (माओवादी केन्द्र)का सांसद माधव सापकोटाले वर्तमान संविधान र व्यवस्थाविरुद्ध कुन नैतिकताले बोलेको भन्दै त्यो अधिकार नभएको बताएका थिए । सो विषयमा शाहीले संविधानमा फरक मत राख्ने अधिकार भएको भन्दै सापकोटालाई जवाफ फर्काएका हुन् ।

• राप्रपालाई सापकोटाले भने– चुनाव लड्ने अनि व्यवस्थाको विरोध गर्ने नैतिकता कहाँबाट आयो ? 

“यो देशमा यो व्यवस्था चाहिने नचाहिने संशोधन गर्न पाइन्छ भनेको छ । कसैले विचार मिल्दैन भन्दै अमूक मान्छेले राजीनामा माग्न पाइँदैन । अलिकति ज्ञान भए संविधान पढेर आउनू, आउँदैन भने हामीसँग सिकाइ माग्नुपर्‍यो,” उनले भने, “संविधानले विशेष अधिकार दिएको छ । कुनै पनि सांसदले स्पष्ट रूपमा वाक् स्वतन्त्रता दिएकाले कसैले राजीनामा माग्न पाइँदैन ।”

आफू जुम्लाका जनताबाट निर्वाचित भएर आएको उनले उल्लेख गरे । “मैले किन राजीनामा दिने ? मैले आठ/नौ वर्षका बच्चाबच्चीको घाँटी काटेर आएको हो ? गुड्दै गरेको बसमा बम हानेर मारेको हो ? किन राजीनामा दिने ? मैले नेपाली जनता मारेको हो ? जातजाति, धर्मको नाममा हिंसा गरेर आएको हो ?,” उनले प्रश्न गरे ।

उनले यति भनेपछि माओवादी केन्द्रका मुख्य सचेतक हितराज पाण्डेले नियमापत्ति जनाएका थिए । तर, सत्तासाझेदार दल नेपाली कांग्रेसका सांसद सुनील शर्माले पाण्डेको विरोध गरे ।

त्यसपछि बोल्दै शाहीले आफू जनताको सेवा गरेर आएको बताए । राजीनामा किन दिने भन्दै थप आवाज उठाए ।