काठमाडौं । त्रिभुवन अन्तर्राष्ट्रिय विमानस्थल हवाई उडानका दृष्टिकोणले अति व्यस्त विमानस्थल हो । आन्तरिक र अन्तर्राष्ट्रिय उडान चाप बढ्दो छ भने विमानस्थल भएर हवाईयात्रा गर्ने यात्रुको संख्या पनि बर्सेनि बढिरहेको छ ।

विमानस्थलमा उडान र यात्रुसँगै आम्दानी पनि बढ्दो छ । विमानस्थल कार्यालयका अनुसार, गत आर्थिक वर्ष २०७९/८० मा ११ अर्ब ३८ करोड रुपैयाँ राजस्व संकलन भएको थियो । चालु आवमा सो विमानस्थलबाट १३ अर्ब रुपैयाँ राजस्व संकलन गर्ने लक्ष्य लिइएको छ । आजसम्म ६ अर्ब ७६ करोड रुपैयाँ राजस्व संकलन गरिएको विमानस्थल कार्यालयले जनाएको छ ।

कार्यालयका महाप्रबन्धक प्रतापबाबु तिवारीले विमानस्थल पूर्ण क्षमतामा सञ्चालनमा आएको, अन्तर्राष्ट्रिय हवाई यात्रु बढेको र सुधारका समग्र प्रयासबाट राजस्व क्रमशः बढिरहेको उल्लेख गरे । विमानस्थल कार्यालयले यात्रुसेवा शुल्क, कोठा र सटर बाहल तथा जहाजको अवतरण, बिसानलगायत शीर्षकबाट राजस्व उठाउँदै आएको छ ।

विमानस्थल कार्यालयले आव २०७७/७८ मा दुई अर्ब ४६ करोड रुपैयाँ राजस्व संकलन गरेको थियो । कोभिड–१९ का कारण उक्त वर्ष राजस्व घटेको कार्यालयले उल्लेख गरेको छ । कोरोनापछि विमानस्थल पूर्ण क्षमतामा सञ्चालित छ ।

त्रिभुवन अन्तर्राष्ट्रिय विमानस्थलमा हाल आन्तरिकतर्फ नौ एयरलाइन्स र १२ हेलिकोप्टर कम्पनी सञ्चालनमा छन् । अन्तर्राष्ट्रियमा तीन नेपालीसहित ३० वायुसेवा कम्पनीले १६ देशका ३१ गन्तव्यमा सेवा दिइरहेका छन् ।

नेपालले हाल ४२ मुलुकसँग दुईपक्षीय हवाई सेवा सम्झौता गरेको छ । पछिल्लोपटक गएको माघ २३ गते नेपाल र स्वीट्जरल्यान्डबीच द्विपक्षीय हवाई सेवा सम्झौतामा हस्ताक्षर भएको थियो । रासस