गोदावरी । नेपाली कांग्रेसको महासमिति बैठकमा महासमिति सदस्य नरहेको व्यक्तिले प्रतिवेदनमाथिको छलफलका क्रममा धारणा राखेपछि विवाद भएको छ ।

वाग्मती प्रदेश र गण्डकी प्रदेश समूहमा जारी छलफलमा स्याङ्जाका मेखलाल श्रेष्ठलाई बोल्न दिइएपछि प्रतिनिधिले आपत्ति जनाएका हुन् । श्रेष्ठ गण्डकीका उपसभापति समेत हुन् । बिहीबार बोल्ने प्रतिनिधिमा उनलाई पनि समय दिइएको थियो । तर, उनी महासमिति सदस्य नरहेको गोरखाका पार्टी सभापति नन्दु न्यौपानेले जानकारी दिए ।

“महाधिवेशन प्रतिनिधिले बोल्न पाएका छैनन् । प्रतिनिधि नै नभएका व्यक्तिलाई बोल्न समय दिइयो,” न्यौपानेले भने, “विधि मिच्ने काम भएकाले प्रतिनिधिहरूले विरोध गरेका हुन् ।”

वाग्मती प्रदेश अध्यक्ष इन्द्रबहादुर बानियाँ र गण्डकी सभापति शुक्रराज शर्माले बोल्न दिएको समय माफी माग्दै रेकर्डबाट हटाइने बताए ।

श्रेष्ठले गठबन्धन गर्नुपर्ने भन्दै बोलेका थिए ।