काठमाडौं । अर्जेन्टिनी फरवार्ड लियोनल मेसीको कप्तानीमा रहेको इन्टर मियामीले मेजर लिग सकर (एमएलएस)को नयाँ सिजन २०२४ मा विजयी सुरुआत गरेको छ । बिहीबार भएको पहिलो खेलमा मियामीले रियल साल्ट लेकविरुद्ध २–० को जित निकालेको हो ।

घरेलु मैदान चेज रंगशालामा मियामीलाई जित दिलाउन रोबर्ट टेलर र डिएगो गोमेजले गोल गरे । खेलको ३९औँ मिनेटमा टेलरले गोल गरेपछि मियामीले पहिलो हाफमा १–० को अग्रता बनाएको थियो ।

निर्धारित समय सकिन सात मिनेट बाँकी रहँदा गोमेजले गोल गर्दै मियामीको अग्रता दोब्बर बनाए ।

साल्ट लेकविरुद्ध मियामीका फरवार्ड लुइस स्वारेजले एमएलएसमा ‘डेब्यु’ गरे । खेलमा पहिलो रोजाइमा मैदानमा उत्रिएका स्वारेज ९०औँ मिनेटमा ‘सब्सिच्युट’ भएका थिए ।

जितसँगै तीन अंक जोडेको मियामी इस्टर्न कन्फेरेन्सको शीर्ष स्थानमा उक्लिएको छ । पराजित साल्ट लेक तालिकाको पुछारमा छ ।