काठमाडौं । अख्तियार दुरुपयोग अनुसन्धान आयोगले घुस मुद्दामा प्रतिकूल बकपत्र गरेको आरोपमा मोरङको सुन्दरहरैचा नगरपालिका बस्ने यादव रिजालविरुद्ध भ्रष्टाचार मुदा दायर गरेको छ । अख्तियारले बुधबार विशेष अदालत काठमाडौंमा उनीविरुद्ध मुदा दायर गरेको हो ।
नेपाल विद्युत् प्राधिकरण इनरुवा वितरण केन्द्रका प्राविधिक कर्मचारी (चौथो तह) विर्जुकुमार महतोले घुस लिई भ्रष्टाचार गरेको मुद्दामा अख्तियारले रिजाललाई सरकारी साक्षीको रूपमा पेस गरेको थियो ।
रिजालले आयोगका अनुसन्धान अधिकृतसमक्ष गरेको बयान कागजको प्रतिकूल हुने गरी बकपत्र गरेपछि अख्तियारले उनीविरुद्ध मुद्दा दायर गरेको हो ।
रिजालले विद्युत् क्षमतामा अभिवृद्धि गर्न २५ हजार रुपैयाँ घुस प्रतिवादी महतोलाई दिएको कार्य भ्रष्टाचार भएको ठहर गर्दै मुद्दा दायर गरिएको अख्तियारद्वारा बुधबार जारी विज्ञप्तिमा उल्लेख छ ।
