काठमाडौं । घनश्याम लामिछाने निर्देशित ‘लन्डन टु पेरिस’ सिनेमाको छायांकन सकिएको छ । कोरोनालगत्तै छायांकनमा गएको सिनेमाको प्राविधिक कारणले २० प्रतिशत सुटिङ बाँकी थियो । चलचित्रको अहिलेको छायांकन सकिएसँगै धमाधम मुम्बईमा सम्पादनको काम चलिरहेको जानकारी निर्देशक घनश्याम लामिछानेले दिएका छन् ।

निर्देशक लामिछानेका अनुसार आफ्नो छायांकन सकेर अभिनेत्री साम्राज्ञी राज्यलक्ष्मी शाह र डेब्यू अभिनेता निश्चल खड्का भारतको मुम्बईबाट नेपाल फर्किसकेका छन् । सिनेमाको सम्पादन सकिएपछि रिलिज डेट घोषणा गर्ने तयारी रहेको निर्देशक लामिछानेले जानकारी दिए । 

सिनेमाको पहिला खिचेको भागको डबिङ र कलर समेत भइसकेको छ । गरिमा शर्मा र कबीर खड्का पनि मुख्य भूमिका रहेको ट्राभल लभस्टोरीको कथामा निर्माण हुन लागेको सिनेमाको सम्पूर्ण छायांकन बेलायतमा गरिएको छ । निश्चल र गरिमा यही सिनेमाबाट डेब्यु गर्दै छन् ।

चलचित्रको कथा, पटकथा र संवाद प्रदीप भारद्वाजले लेखेका हुन् । सिनेमाको निर्मातामा अमित बस्नेत, अजित कुमार थापा, परी राना, अंकित गौतम, सनिश खकुरेल र सह–निर्मातामा अजित सिंह छन् ।