काठमाडौं । भौतिक पूर्वाधार तथा यातायातमन्त्री प्रकाश ज्वालाको बर्खास्तीको माग गर्र्दै आइतबारको प्रतिनिधिसभा बैठकमा गर्मागर्मी बहस भएको छ । सत्ताको विपक्षमा रहेका दलहरूले मन्त्री ज्वाला बालकुमारी घटनामा दोषी ठहर भएको भन्दै बर्खास्तीको माग गरेका हुन् ।
बैठक सुरु भएसँगै विपक्षी दलका सांसदहरूले आसनबाट उठेर आकस्मिक समयको माग गरेका थिए । सभामुख देवराज घिमिरेले समय उपलब्ध गराएपछि प्रमुख प्रतिपक्ष दल नेकपा (एमाले)का सचेतक महेश बर्तौलाले बालकुमारी घटनामा मन्त्री ज्वाला दोषी भएको जनाउँदै उनलाई पदमा बस्ने नैतिकता नभएको उल्लेख गरे ।
सरकार आफँैले बनाएको छानबिन समितिले यही फागुन ४ गते बुझाएको प्रतिवेदनमा घटनाको दोषी मन्त्री ज्वाला भएको देखाएको उनले जनाए । सरकार आफैँले बनाएको समितिले दिएको प्रतिवेदन लागु गर्ने कि नगर्ने भन्दै उनले प्रश्न गरे ।
“सरकार आफैँले बनाएको छानबिन समितिले मन्त्री ज्वालालाई दोषी ठहर गरेको छ । तर, यत्रो दिन बित्दा प्रमले मन्त्री बर्खास्त गरेको सूचना पाएनौँ । सिपाहीलाई कारबाहीको डन्डा, मन्त्रीलाई उन्मुक्ति हुन सक्दैन,” उनले भने ।
यस्तै, राष्ट्रिय स्वतन्त्र पार्टी (रास्वपा)का सभापति समेत रहेका सांसद रवि लामिछानेले छानबिन समतिले मन्त्री ज्वालालाई दोषी भनेर किटान गर्दा पनि प्रधानमन्त्री चुइँक्क बोल्न नसकेको बताए । उनले पनि मन्त्री ज्वालाको राजीनामा माग गर्दै नैतिकता देखाउन सरकारसँग अनुरोध गरे ।
“बालकुमारी घटनामा यो देशमा रोजगारीको अवसर नपाएर विदेशमा रोजगरी गरी परिवार पाल्छु भन्ने युवाहरू वीरेन्द्र शाह र सुजन राउतको दिनदहाडै गोली हानी हत्या गरियो र १० लाख दिएर मुख टाल्ने काम गरियो,” लामिछानेले भने, “यसअघिदेखि नै मन्त्री प्रकाश ज्वाला दोषी रहेको भनिँदै आएको थियो । अहिले छानबिनले नै उहाँ दोषी रहेको प्रमाणित गरेको छ । यसबारे न प्रधानमन्त्री चुइँक्क बोल्नुहुन्छ न त सम्बन्धित मन्त्रीले नै नैतिकता देखाउनुभएको छ ।”
राष्ट्रिय प्रजातन्त्र पार्टी (राप्रपा)का सांसद दीपक सिंहले पनि मन्त्री ज्वालाको बर्खास्तीको माग गरे । उनले देशमा न्याय मरेको छैन भन्ने सन्देश दिने हो भने मन्त्रीलाई तत्काल कारबाही गर्नुपर्ने धारणा राखे ।
गएको पुस १३ गते ललितपुर महानगरपालिका–८, बालकुमारीस्थित ईपीएस कोरिया शाखा कार्यालयमा परीक्षा फाराम भर्ने विषयमा प्रदर्शन गरिएको थियो । मन्त्री ज्वाला अचानक प्रदर्शन भइरहेको स्थानमा पुगेका थिए ।
मन्त्री ज्वाला प्रदर्शनस्थलमा पुगेपछि उनी चढेको गाडीमा प्रदर्शनकारीले आगजनी गरेका थिए । मन्त्री ज्वाला बालकुमारी पुगेपछि प्रदर्शन थप भड्किएको थियो । प्रदर्शन नियन्त्रण गर्न प्रहरीले बल प्रयोग गरेको थियो । प्रहरीले प्रदर्शनकारीमाथि गोली समेत चलाएको थियो ।
गोली लागेर र प्रहरीको कुटपिटबाट अछामको चौरपाटी गाउँपालिका–१ का २१ का वीरेन्द्र शाह र दैलेखको महाबु गाउँपालिका–६ का २३ वर्षीय सुजन रावतको मृत्यु भएको थियो ।
त्यसपछि पुस १६ गतेको मन्त्रिपरिषद् बैठकबाट घटनाबारे जाँचबुझ गरी राय–सुझाव र सिफारिससहितको प्रतिवेदन एक महिनाभित्र पेस गर्ने गरी जाँचबुझ आयोग गठन गरिएको थियो ।
आयोगले पुस २० गतेदेखि कार्य प्रारम्भ गरेको थियो । तोकिएको समयमा कार्य सम्पन्न हुन नसकेकाले मन्त्रिपरिषद्को माघ १८ गतेको निर्णयानुसार फागुन ५ गतेसम्म म्याद थप गरिएको थियो ।
बालकुमारी घटनाको सम्बन्धमा आयोगका पदाधिकारीले घटनास्थलको निरीक्षण, प्रत्यक्षदर्शी, त्यति बेला घटनास्थलमा रहेका सञ्चारकर्मी, पीडितका परिवार, घाइते, विशेषज्ञ डाक्टर र घटनासँग सम्बन्धित अरू मानिससहित १६ जनासँग जानकारी लिएका थिए । आयोगले घटनासँग सम्बन्धित २९ जनाको बयान लिएको थियो ।
