काठमाडौं । नेकपा (माओवादी केन्द्र)मा पार्टीको नाम, चुनाव चिह्न फेर्नेदेखि प्रत्यक्ष निर्वाचन प्रणालीसम्मका विषयमा बहस भइरहेको छ ।
मंगलबारबाट सुरु भएको प्रथम विधान अधिवेशनमा विधान मस्यौदा प्रस्तावमाथिको छलफलका क्रममा नेताहरूले कमिटी प्रणाली सानो बनाउनुपर्ने, आयोगलाई सानो र अधिकारसम्पन्न बनाउनुपर्ने सहितका सुझाव पनि दिएका छन् ।
बैठकमा बुधबार १३ वटा समूहको निष्कर्ष प्रस्तुत गरिएको छ । एक समूहका नेतालाई निष्कर्ष सुनाउन १० मिनेटको समय तोकिएको छ ।
दिलीपकुमार प्रजापतिले पार्टीलाई जनतासमक्ष लैजान नयाँ विधानले सहयोग गर्ने विश्वास व्यक्त गरिएको उल्लेख गर्दै जातीय छुवाछुतलाई गम्भीर अपराधको रूपमा राख्नुपर्ने सुझाव पेस गरे ।
केन्द्रीय सदस्यको संख्या सकेसम्म कम गर्नुपर्ने सुझाव रहेको उल्लेख गर्दै उनले पूर्णकालीन पार्टी सदस्यको व्यवस्था स्पष्टरूपमा व्यवस्था गर्न सुझाव दिए ।
पार्टीको नाम फेर्न सुझाव
माओवादी केन्द्रको नाम नै फेर्नुपर्ने बहस माओवादीमा छ । पार्टीको नाम फेर्नुपर्ने सुझाव आएको केन्द्रीय सदस्य तथा सांसद माधव सापकोटाले जानकारी दिए ।
“पार्टीको नाम फेर्नुर्पछ भन्ने सुझाव आएका छन् । कसैले हाम्रो कम्युनिस्ट पार्टी, कसैले नेपाली कम्युनिस्ट पार्टी राख्नुपर्ने सुझाव दिएका छन्,” उनले भने ।
सहरी राजनीतिलाई मध्यनजर गर्दै पार्टीको नाम फेनुपर्ने उनीहरूको तर्क छ । रुकुम–रोल्पा मात्रै केन्द्रित भएर पार्टी नबन्ने भन्दै नताहरूले सहरी क्षेत्रलाई मध्यनजर गरेर पार्टीको नाम फेर्नुपर्ने सुझाव दिएका हुन् ।
अधिवेशनमा टोलीको निष्कर्ष सुनाउँदै ओम शर्माले पार्टीको नाम फेर्नुपर्ने सुझाव आएको जानकारी गराए । पार्टीको नाम फेर्ने विषयमा समूहगत छलफलबाट मिश्रित प्रतिक्रिया आएको छ ।
पदाधिकारी महाधिवेशनबाट निर्वाचित हुने कि केन्द्रीय समितिबाट ?
माओवादीमा प्रत्यक्ष निर्वाचन विधिबाट जाने प्रस्ताव राखिएको छ । निर्वाचनमा जाँदा महाधिवेशन हलले केन्द्रीय समिति चुन्ने र केन्द्रीय समितिले पदाधिकारी निर्वाचित गर्नुपर्ने एक खालको मत छ । महाधिवेशन हलले नै पदाधिकारी चुन्नुपर्ने मत अर्को खालको छ ।
आफ्नो समूहबाट सुझाव पेस गर्ने क्रममा नेता हिमाल शर्माले पदाधिकारीसहित प्रत्यक्ष निर्वाचनबाट चयन गर्नुपर्ने सुझाव दिए ।
ओम शर्माले पनि प्रत्यक्ष निर्वाचन गर्ने व्यवस्था गर्नुपर्ने बताएका छन् ।
अर्को समूहबाट कञ्चन खनालले महाधिवेशन प्रतिनिधि पार्टी समिति सदस्यबाट निर्वाचित भएर आउनुपर्ने बताए ।
युवराज चौलागाईले प्रत्यक्ष निर्वाचनमा पार्टी समितिलाई लैजानुपर्ने सुझाव पेस गर्दै पार्टीको स्थायी समिति सदस्य विधानमा उल्लेख गर्न नपर्ने धारणा आएको सुनाए ।
चुनाव चिह्न फेर्न प्रस्ताव
विधान अधिवेशनमा चुनाव चिह्न फेर्नुपर्ने प्रस्ताव पनि आएको छ । परशुराम रम्तेलले चुनाव चिह्न फेर्नुपर्ने सुझाव प्राप्त भएको ब्रिफिङ बैठकमा गरे ।
त्यस्तै, हरिराज अधिकारीले चुनाव चिह्न बदल्नुपर्ने सुझाव प्राप्त भएको बताए । उनले सबै पार्टी समितिलाई साना र छरितो बनाउनुपर्ने सुझाव दिए ।
सरल सहयात्रीले प्रस्तावनालाई छरितो बनाउनुपर्ने, पार्टी र निर्वाचन चिह्न फेर्न सुझाव आएको जानकारी गराए ।
प्रज्ञा प्रतिष्ठानमा मंगलबारबाट सुरु भएको विधान अधिवेशनमा विधानको मस्यौदामा छलफलका लागि २० समूह बनाइएको थियो । बाँकी सात समूहको निष्कर्ष बिहीबार प्रस्तुत हुने छ ।
माओवादीले विधानमा विवादित विषयमा भोलि नै टुंगो लगाउने तयारी गरेको छ । “विवादित विषयमा टुंगोमा पुग्न बिहान पदाधिकारी बैठक बस्ने छ । सम्भव भएसम्म भोलि नै केन्द्रीय समिति बैठक बस्ने तयारी पनि छ,” एक नेताले भने ।
-1706524096.JPG)
