काठमाडौं । चालु आर्थिक वर्ष २०८०/०८१ मा विनियोजित बजेटमध्ये पहिलो ६ महिनामा सबैभन्दा धेरै खर्च गर्ने मन्त्रालयको शीर्ष स्थानमा परराष्ट्र मन्त्रालय पर्न सफल भएको छ । बजेट खर्च गर्ने‍ नसक्ने मन्त्रालयको पुछारमा अर्थ मन्त्रालय परेको छ ।

गत साउन १ गतेदेखि पुस मसान्तसम्मको अवधिमा परराष्ट्र मन्त्रालयले चालु आर्थिक वर्षका लागि विनियोजन गरेकोमध्ये ८०.३४ प्रतिशत बजेट खर्च गरिसकेको छ ।

अर्थ मन्त्रालयले सोमबार सार्वजनिक गरेको चालु आर्थिक वर्ष २०८०/८१ को अर्धवार्षिक मूल्यांकन प्रतिवेदनमा यस अवधिमा परराष्ट्रले पाँच अर्ब ७१ करोड ३९ लाख रुपैयाँ खर्च गरिसकेको छ । चालु आर्थिक वर्षका लागि परराष्ट्रलाई सात अर्ब ११ करोड २० लाख रुपैयाँ बजेट विनियोजन गरिएको छ ।

बितेको ६ महिनामा सबैभन्दा कम खर्च गर्ने अर्थ मन्त्रालयलाई चालु आर्थिक वर्षका लागि ४१ अर्ब सात करोड ३६ लाख रुपैयाँ बजेट विनियोजन गरिएको थियो । जसमध्ये ६ महिनामा अर्थले चार अर्ब ६ करोड ४४ लाख रुपैयाँ मात्र खर्च गरेको छ ।

चालु आर्थिक वर्षमा २२ वटा मन्त्रालयहरूको लागि कुल सात खर्ब ३९ अर्ब १० करोड ९६ लाख रुपैयाँ बजेटि विनियोजन गरिएको थियो । ती मन्त्रालय चालु आर्थिक वर्षको पहिलो ६ महिनामा दुई खर्ब २९ अर्ब ४७ करोड ८२ लाख रुपैयाँ मात्र खर्च गर्न सफल भएका छन् । अर्थात् ६ महिनामा २२ वटा मन्त्रालयले ३१.०५ प्रतिशत बजेट मात्र खर्च गरेका छन् ।

प्रतिवेदन अनुसार प्रधानमन्त्री तथा मन्त्रिपरिषद्को कार्यालयलाई चालु आर्थिक वर्ष पाँच अर्ब ६० करोड २८ लाख बजेट विनियोजन गरिएकोमा एक अर्ब ९५ करोड ४२ लाख रुपैयाँ (३४.८८ प्रतिशत) खर्च गरिसकेको छ । 

शिक्षा, विज्ञान तथा प्रविधि मन्त्रालयले पछिल्लो ६ महिनामा २८ अर्ब १८ करोड २८ लाख रुपैयाँ खर्च गरिसकेको छ । यस वर्ष शिक्षा मन्त्रालयलाई ५६ अर्ब ७८ करोड ३४ लाख रुपैयाँ बजेट विनियोजन गरिएको थियो । विनियोजन गरिएकोमध्ये ४९.६३ प्रतिशत बजेट शिक्षाले ६ महिनामा खर्च गरेको छ । 

प्रतिवेदन अनुसार चालु आर्थिक वर्ष गृह मन्त्रालयलाई एक खर्ब ९४ अर्ब ५९ करोड १० लाख रुपैयाँ बजेट छुट्याइएको थियो । जसमध्ये पहिलो ६ महिनामा गृहले ७९ अर्ब ४१ करोड ८२ लाख रुपैयाँ (४०.८१ प्रतिशत) खर्च गरेको छ । 

रक्षा मन्त्रालयले चालु आर्थिक वर्षको पहिलो ६ महिनामा ४६.६३ प्रतिशत बजेट खर्च गरिसकेको छ । यस वर्ष विनियोजन गरिएको ५८ अर्ब ८४ करोड ४६ लाख रुपैयाँमध्ये रक्षाले २७ अर्ब ४३ करोड ९१ लाख रुपैयाँ खर्च गरेको छ ।

कसको खर्च कति ?