काठमाडौं । एकदिवसीय शृंखलाको अन्तिम खेलमा क्यानडाविरुद्ध नेपालका ओपनर भीम सार्कीले शतक बनाएका छन् । 

सोमबार कीर्तिपुरस्थित त्रिवि क्रिकेट मैदानमा क्यानडाले दिएको २३३ रनको लक्ष्य पछ्याइरहेको नेपालबाट भीमले १२७ बलमा शतक बनाएका हुन् । उनले १०० रन पूरा गर्ने क्रममा ११ चौका र एक छक्का प्रहार गरे । एकदिवसीय अन्तर्राष्ट्रिय क्रिकेटमा भीमको यो पहिलो शतक हो ।

जारी खेलको ४४ ओभर समाप्त हुँदा नेपालले एक विकेट गुमाएर २२७ रन बनाएको छ । नेपालबाट हाल क्रिममा भीमसँगै रहेका अनिलले पनि शतक बनाएका छन् । अनिल १०६ रनमा खेलिरहेका छन् । 

नेपाली टिमको खातामा अर्का ओपनर कुशल भुर्तेलले १३ रन थपेका थिए । 

त्यसअघि टस हारेर ब्याटिङमा आएको क्यानडाले निर्धारित ५० ओभरमा आठ विकेट गुमाएर २३२ रनको योगफल खडा गरेको थियो ।