काठमाडौं । बलिङमा कप्तान रोहितकुमार पौडेल चम्किएपछि एकदिवसीय शृंखलाको पहिलो खेलमा नेपालले क्यानडाविरुद्ध सात रनको रोमाञ्चक जित निकालेको छ ।

बिहीबार कीर्तिपुरस्थित त्रिवि क्रिकेट मैदानमा भएको खेलमा नेपालले प्रस्तुत गरेको २२५ रनको लक्ष्य पछ्याएको क्यानडाले ४७.५ ओभरमा सबै विकेट गुमाएर २१७ रनमात्र बनायो ।

एक समय क्यानडा १७४–४ को सहज अवस्थामा थियो । त्यसपछि ४३ रन जोड्दा ६ विकेट गुमाउँदा नेपालले सात रनको रोमाञ्चक जित निकालेको हो ।

क्यानडाका निकोलस किर्टोनले ६८ रन बनाए पनि टिमको हार टार्न सकेनन् । उनले ९९ बलमा सात चौका प्रहार गरे । यस्तै, पर्गत सिंहले ५८ बलमा नौ चौकासहित ५० रन बनाए । ३५–२ को अवस्थाबाट यी दुईले ७९ रनको साझेदारी गर्दै क्यानडाको इनिङ सम्हालेका थिए । 

तर, यसपछिका ब्याटरले उल्लेखनीय प्रदर्शन गर्न सकेनन् । हर्ष थाकेरले ३२ र आरोन जोन्सनले २० रन जोड्दा अन्यले दोहोरो अंकमा रन थपेनन् । 

क्यानडाविरुद्ध रोमाञ्चक जित दिलाउन नेपालका कप्तान पौडेलले चार विकेट लिए । ८.५ ओभर बलिङ गरेका रोहितले दुई मेडन फ्याक्दै ३३ रन खर्चिए । ललित राजवंशीले दुई विकेट लिए । सोमपाल कामी, कुशल मल्ल, पवन सर्राफ र ‘डेब्युट्यान्ट’ रिजन ढकालले समान एक विकेट हात पारे ।

त्यसअघि टस जितेर ब्याटिङमा आएको नेपालले निर्धारित ५० ओभरमा सबै विकेट गुमाएर २२४ रनको योगफल खडा गरेको थियो । 

नेपालबाट ओपनर भुर्तेलले ५८ बलमा नौ चौका र एक छक्कासहित ६२ रन बनाए । एकदिवसीय अन्तर्राष्ट्रिय क्रिकेटमा भुर्तेलको यो सातौँ अर्धशतक हो ।

आरिफ सेखले ५० बलमा चार चौकासहित ३८ रन थपे । सोमपाल कामीले २७, कुशल मल्लले २०, भीम सार्कीले १७ र पवन सर्राफले १५ रन थपे । 

यसबाहेक, ओपनर आसिफ सेख र कप्तान पौडेलले समान आठ रन बनाए । ‘डेब्युट्यान्ट’ रिजन ढकाल चार रनमा पभेलियन फर्किदा सूर्य तामाङले १० रन थपे ।

क्यानडाका उदय भगवानले तीन विकेट लिए । आठ ओभर बलिङ गरेका उदयले एक मेडन फ्याक्दै ४० रन खर्चिए । साद बिन जफरले दुई विकेट लिँदा इश्वरजोत सोही, साहिद अहमदजाई र हर्ष थाकेरले समान एक विकेट लिए । 

आईसीसी विश्वकप क्रिकेट लिग–२ को शृंखलाअघि नेपालले घरेलु मैदानमा तीन खेलको एकदिवसीय शृंखलाका लागि क्यानडालाई निम्ताएको हो । अब नेपालले शनिबार दोस्रो र सोमबार शृंखलाको तेस्रो खेल खेल्नेछ ।