काठमाडौं । नेकपा (एमाले)का प्रमुख सचेतक पदम गिरीले सरकारको असफलताको कारण जनतामा व्यवस्थाप्रति नै प्रश्न उठेको बताएका छन् । 

आजको प्रतिनिधिसभा बैठकमा उनले ओठे भक्तिले देश नबन्ने बताए । उनले पार्टीले गरेको मध्यपहाडी लोकमार्गमा संकल्पयात्राका सन्दर्भमा प्रधानमन्त्रीले दिएको जवाफबारे त्यस्तो बताएका हुन् । अभियान सकिएपछि प्रधानमन्त्री पुष्पकमल दाहाल प्रचण्डलाई जनताले दिएको सुझाव बुझाएको बताए । 

प्रधानमन्त्रीले उक्त सुझाव मार्गदर्शक हुने बताएको भन्दै देशको समस्या समाधान गर्न इच्छाशक्ति चाहिने बताए । “यो ओठे भक्तिले देशको समस्याको समाधान हुन सक्दैन । देशको समस्याको समाधानका निम्ति दृढ इच्छाशक्ति चाहिन्छ । इमान्दारिता चाहिन्छ । देश र जनतालाई केन्द्रमा राखेर निष्ठापूर्वक जनताको समस्या समाधान गर्ने संकल्प नगर्दासम्म हुँदैन,” उनले भने । 

उनले रोजगार नपाएर, बैंकको ब्याज तिर्न नसकेर युवा बाहिर जानुपरेको बताए । युवा थिए र गए भन्ने ढंगले प्रस्तुत हुन नहुने उनको भनाइ छ । युवाहरूलाई देशमा रोजगारी दिने भनेर अघि नबढे जनताको सेवा गरेको भन्ने नसकिने बताए ।