काठमाडौं । नेपाल खेलकुद पत्रकार मञ्चले हरेक वर्ष आयोजना गर्ने एनएसजेएफ पल्सर स्पोर्ट्स अवार्डको २०औँ संस्करणका निम्ति वर्ष पुरुष खेलाडीको मनोनयन सार्वजनिक गरेको छ ।

आइतबार मञ्चले वर्ष पुरुष खेलाडीको मनोनयनमा पर्न सफल उत्कृष्ट आठजनाको नाम सार्वजनिक गरेको हो । वर्ष ०७९ सालमा गरेको प्रदर्शनका आधारमा मनोनयन गरिएको मञ्चले जनाएको छ ।

अवार्डका लागि पुरुष वर्ष खेलाडीमा क्रिकेटका आसिफ सेख, एथ्लेटिक्सका दीपक अधिकारी र मुकेश पाल, भलिबलका मानबहादुर तामाङ, पौडीका नासिर याहा हुसैन, क्रिकेटका रोहित पौडेल, बुद्धिचालका रुपेश जैसवाल र गल्फका सुवास तामाङ मनोनयनमा परेका छन् ।

यसअघि, पिपल्स च्वाइस विधाको मनोनयन सार्वजनिक भइसकेको छ । पिपल्स च्वाइसमा फुटबलका अनन्त तामाङ, करातेका विप्लवलाल श्रेष्ठ, भलिबलकी निरुता ठगुन्ना, टेबलटेनिसकी सिक्का सुवाल श्रेष्ठ र शारीरिक सुगठनकी रजनी श्रेष्ठ मनोनयनमा परेका छन् ।

मञ्चले वर्षका उत्कृष्ट युवा तथा प्रशिक्षक विधाको मनोनयन पनि छिटै सार्वजनिक गरिने जनाएको छ ।

पारा एथलिट सम्मान, स्पेसल अवार्ड, लाइफटाइम अचिभमेन्ट अवार्ड र एसियन स्पोर्ट्स जर्नालिस्ट अवार्डको घोषणा माघ २८ गते कार्यक्रमकै दिन गरिनेछ ।

योपटक वर्ष पुरुष, महिला, युवा, प्रशिक्षक र पिपल्स च्वाइस गरी पाँच विजेताले बजाज पल्सर मोटरसाइकल पाउनेछन् । तीमध्ये दुई एन२५० र तीन एन१६० मोटरसाइकल हुनेछन् । अरू विधाका विजेतालाई जनही ५० हजार रुपैयाँ र गिफ्ट ह्याम्पर प्रदान गरिनेछ ।

स्पोर्ट्स अवार्डको मुख्य प्रायोजकमा हंशराज हुलासचन्द एन्ड कम्पनी तथा सहप्रायोजक र सहयोगीमा ई–सेवा, केल्मी, सूर्य नेपाल प्रालि, होटेल याक एन्ड यती, युनाइटेड अजोड इन्स्योरेन्स, लालपुर्जा नेपाल, सुबिसु, रोयल सिंगी होटेल, प्लाजा गु्रप अफ होटेल्स, आईएसएस, ई–ड्राइभ नेपाल, राष्ट्रिय खेलकुद परिषद् (राखेप) र नेपाल ओलम्पिक कमिटी छन् ।

तथ्यांकमा वर्ष पुरुष खेलाडीको उत्कृष्ट आठ मनोनयन

आसिफ शेख (क्रिकेट)
– वर्ष २०७९ को एकदिवसीय अन्तर्राष्ट्रियमा कुल एक हजार ९३ रन बनाउन सफल खेलाडी
– विश्वकप लिग–२ मा पपुवा न्युगिनीविरुद्ध बनाएको ११० रनको शतकीय इनिङ्स
– एकदिवसीय अन्तर्राष्ट्रियमा सात अर्धशतक बनाउन सफल खेलाडी ।

दीपक अधिकारी (एथ्लेटिक्स)
– एसियाली क्रसकन्ट्री दौडमा दुई स्वर्ण, घरेलु प्रतियोगितामा तीन स्वर्ण र एक रजतपदक
– १६औँ एसियाली क्रसकन्ट्रीमा पुरुष १० किमिमा स्वर्ण
– १६औँ एसियाली क्रसकन्ट्रीमा पुरुष टिम इभेन्टमा स्वर्ण
– नवौँ राष्ट्रिय खेलकुदमा पुरुष १० किमिमा राष्ट्रिय कीर्तिमानसहित स्वर्ण
– दोस्रो राइट टु प्रोटिन, प्रधानसेनापति कप र लुम्बिनी हाफ म्याराथनमा स्वर्ण
– कान्तिपुर हाफ म्याराथनमा रजत ।

मुकेश पाल (एथ्लेटिक्स)
– १६औँ एसियाली क्रसकन्ट्रीमा पुरुष टिम इभेन्टमा स्वर्ण
– १६औँ एसियाली क्रसकन्ट्रीमा पुरुष १० किमि दौडमा कास्य
– राष्ट्रिय एथ्लेटिक्समा पुरुष १५०० मिटरमा स्वर्ण र ३०० मिटरमा रजत  
– नवौँ राष्ट्रिय खेलकुदमा पुरुष १५०० मिटर दौडमा स्वर्ण
– कान्तिपुर हाफ म्याराथनमा कास्य
– जेसिज हाफ म्याराथनमा स्वर्ण ।

मानबहादुर श्रेष्ठ (भलिबल)
– बंगलादेशको ढाकामा सम्पन्न काभा मेन्स बिच भलिबलमा दिल सुनार जोडीसँग मिलेर रजतपदक
– बिच भलिबलमा रजत जित्ने टिमका कप्तान 
– राष्ट्रिय भलिबल टोली तथा त्रिभुवन आर्मी क्लबका कप्तान
– पुरुषतर्फ बंगलादेश र माल्दिभ्सलाई हराएर सेमिफाइनल पुग्दा सदस्य ।

नासिर याहा हुसेन (पौडी)
– नवौँ राष्ट्रिय खेलकुदमा सर्वाधिक सात स्वर्ण, दुई रजत र एक कास्य जित्न सफल  
– पुरुष १०० मिटर बटरफ्लाई, १५०० मिटर फ्रिस्टायल, २०० मिटर फ्रिस्टायल, ४०० मिटर फ्रिस्टायल, २०० मिटर मिड्ले, ४ गुणा १०० मिटर मिक्स रिले र ४ गुणा १०० मिटर रिले इभेन्टमा स्वर्ण  
– १०० मिटर ब्रेस्ट स्ट्रोकमा रजत र १०० मिटर फ्रिस्टायलमा रजत, ४ गुणा २०० मिटर फ्रिस्टायल रिलेमा कास्य ।

रोहित पौडेल (क्रिकेट)
– नेपालले विश्वकप लिग–२ को अन्तिम १२ मध्ये ११ खेल जित्दै एकदिवसीय अन्तर्राष्ट्रिय (ओडीआई) जोगाउँदाका कप्तान 
– वर्ष २०७९ मा कुल २७ एकदिवसीय अन्तर्राष्ट्रिय खेल खेल्दै चार अर्धशतकसहित ६७९ रन बनाउन सफल
–आयरल्यान्डविरुद्धको खेलमा निर्णायक अविजित ९५ रनको अर्धशतक ।

रुपेश जैसवाल (बुद्धिचाल)
– छत्तीसगढ चिफ मिनिस्टर ट्रफी अन्तर्राष्ट्रिय ग्रान्ड मास्टर चेसमा विदेशी इभेन्टमा रजत 
– भारतको चेन्नईमा भएको ४४औँ फिडे चेस ओलम्पियाडमा नेपालको तर्फबाट उच्चतम अंक हासिल गर्ने खेलाडी (१०÷६) 
– नयाँ दिल्लीमा भएको एसियन कन्टिनेन्टल चेस च्याम्पियनसिपको ब्लिट्जमा ९३ खेलाडीमध्ये ११औँ स्थानमा रहन सफल
– नवौँ राष्ट्रिय खेलकुदमा र्‍यापिड र ब्लिट्जतर्फ दोहोरो स्वर्ण र क्लासिकलमा रजत
– आधा दर्जनभन्दा बढी राष्ट्रिय प्रतियोगितामा स्वर्ण जित्न सफल ।

सुवास तामाङ (गल्फ)
– नेपाल टुरिजम कप र बंगलादेश एमेच्योर गल्फ च्याम्पियनसिपमा नेपाललाई टिम च्याम्पियन बनाउन सफल खेलाडी 
– बंगलादेश एमेच्योर गल्फ च्याम्पियनसिपमा व्यक्तिगततर्फ रजत जित्न सफल 
– नवौँ राष्ट्रिय खेलकुदमा व्यक्तिगतमा स्वर्ण जित्न सफल । टिममा आर्मीबाट कांस्य पदक जित्न सफल ।