काठमाडौं । नेकपा (एमाले) धादिङ जिल्ला अधिवेशनको विवादबारे छलफलका निम्ति अध्यक्ष केपी शर्मा ओलीले नेताहरूलाई बालकोटस्थित आफ्नो निवासमा बोलाएका छन् । जिल्ला अधिवेशन सोमबार (भोलि) बिहान ८ बजेसम्मका लागि स्थगित गरिएको छ ।

अध्यक्ष ओलीसँग छलफलका निम्ति नेताहरू काठमाडौंतर्फ लागेको एमाले धादिङका उपसचिव राधिका सापकोटाले जानकारी दिइन् ।

ओलीले प्रदेश इन्चार्ज गुरु बराल, वाग्मती प्रदेश अध्यक्ष कैलाश ढुंगेल, धादिङ अधिवेशनका अध्यक्षमण्डलका अध्यक्ष धर्मदत्त देवकोटा, जिल्ला अध्यक्ष भूमि त्रिपाठीलगायत नेतालाई छलफलका निम्ति बोलाएका हुन् ।

यही माघ १९ गते महासचिव शंकर पोखरेलले उद्घाटन गरेको अधिवेशनमा प्रतिनिधि छनोट र अध्यक्षमण्डलका विषयमा विवाद भएको थियो । महाधिवेशनमा कुटपिटको अवस्था सिर्जना भएपछि प्रदेश अध्यक्ष ढुंगेलले अधिवेशन स्थगित गरेका थिए । जिल्ला अध्यक्ष त्रिपाठीले भने बन्दसत्र अघि बढाउने तयारी गरेका थिए । तर, अन्योलपछि बैठक स्थगित गरिएको नेताहरूले बताएका छन् ।