काठमाडौं । क्यान्सरको उपचारमा प्रयोग हुने प्रभावकारी उपचार पद्धति ‘कार–टी सेल’ थेरापी नेपालमा पनि भित्र्याइने भएको छ । सेन्टर फर रिजेनरेटिभ मेडिसिन (सीआरएम) नेपालले कार–टी सेलको नेपालमै पहिलोपटक सफल परीक्षण गरेको छ ।

यो विकसित मुलुकहरूमा प्रयोग भइरहेको नवीनतम उपचार विधि हो । अमेरिकाको नेसनल क्यान्सर इन्स्टिच्युट र पेन्सिलभेनिया विश्वविद्यालयमा गरिएको कार–टी सेल थेरापीको अध्ययनमा ९० प्रतिशतभन्दा बढी ‘बी–सेल’ क्यान्सर बिरामी पूर्ण रूपमा निको भएको पाइएको छ ।

कलेजोसहित पाँच प्रकारका रक्त क्यान्सरमा यो विधि प्रयोग हुने एस्ट्राजेनेका फार्मास्युटिकल्सका अंकोलोजी विभाग प्रमुख एवं सीआरएम नेपालका सल्लाहकार डा. सञ्जीवन गौतमले जानकारी दिए । कार–टी सेल उपचार पद्धतिको प्रयोग एएलएल र एनएचएल क्यान्सर बिरामीका निम्ति प्रभावकारी हुने उनको भनाइ छ ।

“यसमा प्रयोग हुने रिएजेन्ट र उपकरण निकै महँगा र जटिल प्रविधियुक्त हुन्छन् । तीनदेखि पाँच करोडसम्म खर्च लाग्ने कार–टी सेल थेरापीलाई १० गुणा कम लागतमा उपलब्ध गराउने सीएमआर नेपालको उद्देश्य छ,” डा. गौतमले भने ।

यो विधि नेपालमा प्रयोगमा ल्याउँदा रक्त क्यान्सरका बिरामी लाभान्वित हुने आकलन गरिएको छ ।

कार–टी सेल थेरापी क्यान्सर मात्र नभई कलेजो, मधुमेह, स्वप्रतिरक्षा तथा मुटुसम्बन्धी रोगहरूमा पनि प्रभावकारी देखिएको वीर अस्पतालका वरिष्ठ कलेजो रोग विशेषज्ञ प्रा. डा. सुधांशु केसीले बताए ।

नेपालमा कार–टी सेलको सफल परीक्षणका निम्ति डा. केसी, डा. गौतमलगायत विज्ञको टिमले पछिल्लो एक वर्षदेखि काम गर्दै आएको थियो । यो उपचार पद्धतिलाई कानुनी प्रकिया र जनशक्तिको व्यवस्थापन गरी प्रयोगमा ल्याउन अझै एक वर्ष लाग्ने सीआरएम नेपालले जनाएको छ ।