काठमाडौं । नसर्ने रोगहरूको व्यवस्थापनका निम्ति एकीकृत मार्गदर्शन बनाउन जरुरी रहेको विज्ञले बताएका छन् । ७१औँ विश्व कुष्ठरोग दिवसका अवसरमा आइतबार काठमाडौंमा आयोजित एक कार्यक्रममा यस्तो बताइएको हो ।

कार्यक्रममा स्वास्थ्य सेवा विभागकी महानिर्देशक डा. संगीता कौशल मिश्राले रोग नियन्त्रणका निम्ति एकीकृत ‘केस रिडिङ’ र सामुदायिक निगरानी तथा ‘सर्भिलेन्स’ आवश्यक रहेको औँल्याइन् । कुष्ठरोग नियन्त्रणका लागि समुदायस्तरमा राम्रोसँग निगरानी गर्न नसकिएको उनको भनाइ छ ।

कुष्ठरोग मधेस प्रदेशमा बढी देखिएको र अधिकांश युवा तथा बालबालिका रोगी भएको उनले उल्लेख गरिन् ।

‘इन्टिग्रेटेड डिजिज केस फाइनिङ’ र ‘इन्टिग्रेटेड डिजिज सर्भिलेन्स’को अब समय भइसकेको र एकीकृत रूपमा गए मात्र फरक–फरक रोगहरूको नियन्त्रण सम्भव रहेकामा उनले जोड दिइन् ।

कार्यक्रममा वरिष्ठ सरुवा रोग विशेषज्ञ डा. अनुप बास्तोलाले विभिन्न रोगहरूका छुट्टै ‘रोडम्याप’ भए पनि अब एकीकृत रूपमा अघि बढ्न जरुरी रहेको बताए । रेबिज रोगका निम्ति ‘वान हेल्थ रणनीति’ तयार गरिए पनि प्रभावकारी कार्यान्वयन हुन नसकेको उनले सुनाए ।

कुकुरको टोकाइबाट हुने रेबिजलाई शून्यमा झार्न ७० प्रतिशतभन्दा बढी सामुदायिक कुकुरलाई खोप लगाउने अभियान सुरु गर्न जरुरी रहेको उनको भनाइ छ ।

जलवायु परिवर्तनको असर अत्यधिक बढेकाले डेंगी हिमालसम्मै देखिने गरेको र यसमा अध्ययनका कार्यक्रम अघि बढाउनुपर्ने उनले औँल्याए । न्युज एजेन्सी नेपाल