काठमाडौं । त्रिभुवन अन्तर्राष्ट्रिय विमानस्थलमा शुक्रबार प्रहरीसँग हानाहानमा उत्रिएका अध्यागमन अधिकृत छायालाल मोक्तानका निम्ति यो पहिलो घटना नभएको खुलेको छ ।
केही दिन अघिमात्रै विमानस्थल पास इकाइका ‘ड्युटी अफिसर’ गोपाल घिमिरेमाथि समेत हातपात गरेको प्रहरी बताउँछ ।
प्रहरीका अनुसार, पाससम्बन्धी विवाद हुँदा घिमिरेमाथि उनले हातपात गरेका थिए । उक्त प्रकरणबारेसमेत छानबिन भइरहेको छ । घिमिरेमाथि हातपात गरेको केही दिनभित्रै मोक्तानले प्रहरीसँग हानाहानमा संलग्न भएको भिडियो सार्वजनिक भएको हो ।
गृह प्रवक्ता नारायणप्रसाद भट्टराईले अध्यागमन अधिकृत मोक्तानका यसअघिका गतिविधिबारे पनि समितिले छानबिन गर्ने जानकारी दिए । उनले भने, ‘‘समितिको सिफारिशअनुसार मन्त्रालयले कारबाही प्रक्रिया अघि बढाउँछ ।’’
अध्यागमनका अधिकृत मोक्तानलाई शुक्रबार प्रहरीले जाँच गर्ने क्रममा विवाद हुँदा प्रहरी र उनीबीच हात हालाहाल भएको थियो । विमानस्थल प्रहरीका एसपी पदम विष्टका अनुसार, अध्यागमन अधिकृत मोक्तान अन्तर्राष्ट्रिय विमानस्थलतर्फको डिपार्चरबाट एराइभलतिर आइरहेका थिए ।
त्यहीबेला वाक थ्रू (एक्स–रे) गेट पासको चेकिङमा रहेका प्रहरी जवान रविरन्जन गुप्ताले मोक्तानको शरीर जाँचगर्न खोज्दा विवाद सृजना भएको थियो । त्यहाँ विवाद देखेपछि प्रहरी सहायक निरीक्षक (असई) सन्जय तामाङसमेत एक्स–रे गेटमै पुगे ।
असई सन्जय तामाङ पुगेपछि अध्यागमनका अधिकृत छायालाल मोक्तानले जवान गुप्तामाथि लात्ती प्रहार गर्दै बारिरिएको क्लोज सर्टिक (सीसीटीभी) फुटेजमा देखिन्छ । प्रहरी जवान गुप्तासहित असई तामाङले समेत मोक्तानमाथि हातपात गरेको दृश्य सीसीटीभी फुटेजमा देखिन्छ ।
घटना लगत्तै प्रहरी र आफ्ना कर्मचारी मोक्तानको विवादबारे सीसीटीभी फुटेज हेर्न गएका अध्यागमन प्रमुख गोगनबहादुर हमालमाथि समेत प्रहरीले अभद्र व्यवहार गरेको उनको दाबी छ ।
गृहमन्त्रालयअन्र्तगतका दुई छुट्टाछुट्टै निकायबीच विवाद डिय्टीमै छताछुल्ल हुनु गम्भीर घटना भएको प्रहरीको दाबी छ । अझ त्यसमाथि अन्तर्राष्ट्रिय विमानस्थलजस्तो सुरक्षाका दृष्टिकोणले संवेदनशील मानिएको क्षेत्रमा ।
विवादबारे छानबिन गर्न गृहमन्त्रालयले शुक्रबार मन्त्रालयका सहसचिव थानेश्वर गौतमको नेतृत्वमा तीन सदस्यीय छानबिन समिति बनाइसकेको छ ।
तीन दिनको समयसीमा दिएको उक्त छानबिन समितिमा प्रहरी नायव महानिरीक्षक (डीआईजी) राजेशनाथ बाँस्तोला र गृहमन्त्रालयलकै उपसचिव कुलबहादुर जीसी सदस्य छन् । उनीहरूले आइतबार (आज) बाट छानबिन थालेका छन् ।
मंगलबार छानबिन प्रतिवेदन गृहमन्त्रालय बुझाउने छन् । घटनामा संलग्न प्रहरी र अध्यागमनका अधिकृत मोक्तान दुवै पक्षलाई छानबिन समितिले सोधपुछका लागि बोलाएको छ । विमानस्थल प्रहरी प्रमुख प्रहरी नायब महानिरीक्षक (डीआईजी) अर्जुन चन्द ठकुरीले घटनाबारे छानबिन समितिले काम थालिसकेकाले आफूले प्रक्रिया दिन उपयुक्त हुने बताउँछन् ।
भिजिट भिसा कडाई गर्दाको टकराव
त्रिभुवन विमानस्थल प्रहरीका अनुसार, अध्यागमनका कर्मचारी र प्रहरीबीचको टकरावको नाभी भने भ्रमण प्रवेशाज्ञा (भिजिट भिसा) सँग जोडिएको छ ।
प्रहरीको उपत्यका अपराध अनुसन्धान कार्यालयको टोलीले भिजिट भिसामा खाडी मुलुक जाने तर अवैध तरिकाले उतै लुक्ने घटना बढेपछि सक्रियता बढाएको हो । त्यसपछि भिजिट भिसामा जाने यात्रुमाथि चेकजाँच कडाईं मात्रै गरेन, भिजिट भिसाको सेटिङमा संलग्न अध्यागमनका कर्मचारीलाई पक्राउ गर्यो ।
अनुसन्धान कार्यालयको टोलीले २६ मंसिरमा नक्कली कागजातका आधारमा भिजिट भिसामा विदेश पठाउने गिरोहसँग मिलेमतो गरेको आरोपमा अध्यागमनका अधिकृत नरवीर खड्कालाई पक्राउ गरेको थियो ।
भिजिट भिसामा नक्कली कागजातका आधारमा पठाउने गिरोहमाथि काठमाडौं प्रहरीले कीर्ते तथा संगठित अपराधमा अनुसन्धान गरको थियो । आइतबार ५७ दिनमा काठमाडौं प्रहरीले संगठित अपराध अनुुसन्धान प्रतिवेदन जिल्ला सरकारी वकिल कार्यालय काठमाडौं बुझाएको छ ।
जसमा पक्राउ परेका अध्यागमन अधिकृत खड्का, अध्यागमनबाट हाल सरुवा भइ गृहमन्त्रालय पुगेका अधिकृत ताराबहादुर कुँवरसहित अन्य सातजना कर्मचारीलाई प्रतिवादी बनाइएको छ । त्यही कारण विमानस्थल अध्यागमनका कर्मचारी प्रहरीसँग असन्तुष्ट छन् ।
प्रहरीको अनुसन्धानका क्रममा पक्राउ परेका अध्यागमनका अधिकृत खड्काले भिजिट भिसामा जानेहरूसँग सेटिङमा मिलाएर रकम उठाउन छुट्टै ‘टिम’ बनाएको र आफूले रकम उठाएर सबै कर्मचारीले बाँडेर लिने गरेको बयान प्रहरीलाई दिएका छन् ।
प्रहरीले मंसिरमा मात्रै भिजिट भिसामा ‘सेटिङ’ गरेर पठाउने अध्यागमनका कर्मचारी ट्राभल, कन्सल्टेन्सी र म्यानपावरका सञ्चालकहरू गरेर ३२ जनाभन्दा बढीलाई मुद्दा चलाएको थियो । नक्कली कागजातका आधारमा भिजिट भिसामा जानेहरूबाट अध्यागमन विभागका कर्मचारीले घुमाउरो बाटोबाट एक दिनमै करोड रुपैयाँसम्म उठाउने गरेको प्रहरीको दाबी छ ।
