काठमाडौं । ब्याटिङमा अनिलकुमार साह र बलिङमा रञ्जितकुमार चम्किएपछि प्रधानमनत्री कप पुरुष राष्ट्रिय क्रिकेट प्रतियोगितामा मधेसले गण्डकी प्रदेशविरुद्ध १४५ रनको जित निकालेको छ ।

बिहीबार कीर्तिपुरस्थित त्रिवि क्रिकेट मैदानमा मधेसले प्रस्तुत गरेको ३३६ रनको लक्ष्य पछ्याउने क्रममा गण्डकीले ३९.५ ओभरमा सबै विकेट गुमाएर १९० रनमात्र जोड्न सक्यो । 

गण्डकीका ओपनर इश्वर क्षेत्री र कमल परियारले समान २७ रन थपे । कृष ऐयरले २६, चन्द्र पौडेलले २३ र रोशन गौतमले २२ रन जोड्दा समिर कँडेल र मुस्कान थापाले समान १८ रन बनाए । 

गण्डकीलाई सस्तैमा समेट्न मधेसका रञ्जित कुमारले चार विकेट लिए । १० ओभर बलिङ गरेका रञ्जितले एक मेडन फ्याक्दै ५१ रन खर्चिए । कप्तान हरिशंकर साहले तीन विकेट लिए । प्रदीप पासवानले दुई विकेट लिँदा राजेश यादवले एक विकेट हात पारे ।

त्यसअघि विकेटकिपर ब्याटर अनिल साहले शतक बनाएपछि टस जितेर ब्याटिङमा आएको मधेसले निर्धारित ५० ओभरमा पाँच विकेट गुमाएर ३३५ रनको योगफल खडा गरेको थियो । 

मधेसका अनिलले १२७ रन बनाए । अनिलले १२५ बलमा ११ चौका र ६ छक्का प्रहार गरे । आक्रामक रूपमा प्रस्तुत भएका अर्निको यादवले ३४ बलमा पाँच चौका र तीन छक्कासहित ६३ रन थपे । पवन सर्राफले ४०, रुपेश सिंहले ३२ र अभिषेक तिवारीले २७ रन जोडे । 

मधेसविरुद्ध फितलो बलिङ गरेको गण्डकीका कृष्ण पौडेल यो प्रतियोगितामै सबैभन्दा धेरै रन खर्चिने बलर बने । १० ओभर बलिङ गरेका कृष्णले ११७ रन खर्चिए । उनले एक विकेट लिएका थिए । यस्तै, सन्दीप पराजुलीले दुई विकेट लिँदा कमल परियारको नाममा एक विकेट रह्यो ।

जितसँगै आठ खेलबाट १० अंक जोडेको मधेस तालिकाको तेस्रो स्थानमा छ । ६ खेलबाट चार अंक जोडेको गण्डकी तालिकाको आठौँ स्थानमा छ ।

प्रतियोगिताअन्तर्गत बिहीबार नै भएको खेलमा सुदूरपश्चिम प्रदेशले वाग्मती प्रदेशसँग ९७ रनको हार बेहोरेको छ ।

जितसँगै आठ खेलबाट १० अंक जोडेको वाग्मती तालिकाको दोस्रो स्थानमा उक्लिएको छ । ६ खेलबाट आठ अंक जोडेको सुदूरपश्चिम तालिकाको पाँचौँ स्थानमा छ ।