काठमाडौं । आयोजक सहारा क्लबविरुद्ध २–१ को रोमाञ्चक जित निकाल्दै थ्री स्टार क्लब २३औँ आहा रारा पोखरा गोल्डकपको क्वार्टरफाइनलमा प्रवेश गरेको छ ।

मंगलबार पोखरा रंगशालामा सम्पन्न खेलमा थ्री स्टारलाई जिताउन कप्तान योगेश गुरुङ र एञ्जल महर्जनले गोल गरे । सहाराका आशिष गुरुङले एक गोल फर्काए पनि टिमको हार टार्न सकेनन् ।

खेलको पाँचौँ मिनेटमै योगेशले गोल गर्दै थ्री स्टारलाई अग्रतामा राखेका थिए । 

तर, २३औँ मिनेटमा सहाराका आशिषले गोल गर्दै खेललाई बराबरीमा ल्याए । आशिषले लक्ष्मण रुचालको फ्रिकिक प्रहारलाई हेडमार्फत पोस्टको दिशा दिएका हुन् ।

५९औँ मिनेटमा एञ्जलले गोल गर्दै थ्री स्टारलाई २–१ को अग्रतमा राखे । एञ्जलको यही गोल निर्णायक बन्दा थ्री स्टार रोमाञ्चक जितसहित क्वार्टरफाइनलमा प्रवेश गर्‍यो । थ्री स्टारले अब सेमिफाइनल प्रवेशका लागि शनिबार भुटानको पारो एफसीको सामना गर्ने छ ।

प्रतियोगिताको यस संस्करणमा भुटानको एक टिमसहित कुल १२ टिमको सहभागिता छ । यसअघि भारतको एक टिम आउने जनाइए पनि अन्तिम समयमा उक्त टोलीले नाम फिर्ता लिएको थियो ।