काठमाडौं । साविक विजेता नोभाक जोकोभिच वर्षको पहिलो ग्रान्डस्लाम अस्ट्रेलियन ओपन–२०२४ को सेमिफाइनलमा प्रवेश गरेका छन् । 

मंगलबार रोड लभेर एरिनामा भएको खेलमा अमेरिकाका टेलर फ्रिट्जलाई ३–१ को सेटमा हराउँदै अन्तिम–४ को यात्रा तय गरेका हुन् । १२औँ वरीयताका फिट्जविरुद्ध सर्वियन स्टार जोकोभिचले पहिलो सेट ७–६ (७–३) ले जितेका थिए । दोस्रो सेट ६–४ ले जित्दै फिट्जले खेल बराबरीमा ल्याएका थिए । तर, त्यसपछिका दुई सेट ६–२, ६–३ को सहज स्कोरमा जित्दै जोकोभिचले उपाधि रक्षाको यात्रा कायम राखेका हुन् । 

विश्व नम्बर एक जोकोभिचले अब फाइनलमा प्रवेशका लागि इटालीका जानिक सिनर र एन्डी रुभलेभबीचको विजेतासँग खेल्नेछन् । सन् २००५ देखि अस्ट्रेलियन ओपनको एकलमा प्रतिस्पर्धा गर्न सुरु गरेका जोकोभिचले हालसम्म १० पटक यसको उपाधि चुमिसकेका छन् ।

महिला एकलतर्फ अमेरिकाकी कोको गौफ र आर्यना साबालेन्काले सेमिफाइनलमा स्थान बनाए ।

रोड लभेरमै भएको खेलमा वरीयताको चौथो स्थानकी गौफले ३७औँ स्थानकी मार्टा कोट्युकलाई २–१ को सेटमा हराइन् । निक्कै रोमाञ्चक खेलको पहिलो सेट गौफले ७–६ (८–६) ले जितेकी थिइन् । दोस्रो सेट ७–६ (७–३) ले जित्दै कोट्युक खेलमा फर्किए पनि तेस्रो सेट ६–२ ले जित्दै गौफले अन्तिम–४ को यात्रा तय गरिन् ।

यूएस ओपन च्याम्पियन १९ वर्षीय गौफले अब फाइनल प्रवेशका लागि साविक विजेता आर्यना साबालेन्काविरुद्ध खेल्ने छिन् ।

वरीयताको दोस्रो स्थानकी साबालेन्काले चेक गणतन्त्रकी बार्बोरा क्रेजिकोभालाई ६–२, ६–३ को सोझो सेटमा हराउँदै अन्तिम चारको यात्रा तय गरेकी हुन् ।