काठमाडौं । प्रधानमन्त्री कप पुरुष राष्ट्रिय क्रिकेट प्रतियोगितामा कर्णाली प्रदेशले कोसी प्रदेशविरुद्ध ६ विकेटको सहज जित निकालेको छ । मंगलबार मूलपानी क्रिकेट मैदानमा कोसीले प्रस्तुत गरेको १५२ रनको लक्ष्य कर्णालीले २८.३ ओभरमा चार विकेट गुमाएर भेट्टायो ।

कर्णालीको जितमा अर्जुन घर्तीले अर्धशतक बनाए । उनले ४८ बलमा ६ चौका र दुई छक्कासहित ५० रनको योगदान गरे । विपीन शाहीले २८, हिमान्सु शाहीले २४, निश्चल रावलले २१ र कप्तान रवीन्द्र शाहीले १२ रन थपे ।

कोसीका हेमन्त राईले तीन विकेट लिए । कमल खत्रीले एक विकेट हात पारे ।

त्यसअघि, टस हारेर ब्याटिङमा उत्रिएको कोसीले ३४.३ ओभरमा सबै विकेट गुमाएर १५१ रन बनाएको थियो । कोसीका सुजन थपलियाबाहेक अरू ब्याटरले खुलेर खेल्न सकेनन् ।

सुजनले ७३ बलमा आठ चौका र चार छक्कासहित ७३ रन बनाए । सौजन घिमिरेले १२ र आइस भट्टराई ११ बाहेक अरू खेलाडीले दोहोरो अंकमा रन जोड्न सकेनन् ।

कोसीलाई सस्तैमा रोक्न कर्णालीका दिनेश अधिकारीले चार विकेट लिए । प्रकाश जैसीले तीन र दिवन पुनले दुई विकेट हात पारे ।

जितसँगै ६ खेलबाट ६ अंक जोडेको कर्णाली तालिकाको पाँचौँ स्थानमा उक्लिएको छ । प्रतियोगितामा कर्णालीको यो तेस्रो जित हो । कोसीको भने यो लगातार सातौँ हार हो । पुछारमा रहेको कोसी अझै अंकविहीन छ ।