काठमाडौं । इन्जुरी समयमा विपक्षी खेलाडीबाट आत्मघाती गोल हुँदा एएफसी एसियन कपमा दक्षिण कोरियाले २–२ को बराबरी खेल्दै जोर्डनसँगको सम्भावित हार टारेको छ ।

शनिबार कतारको अल थुमामा रंगशालामा भएको खेलमा दक्षिण कोरिया ९० मिनेटसम्म २–१ ले पछि थियो । तर, इन्जुरी समयमा जोर्डनका याजन अल–अरबबाट आत्मघाती गोल भएपछि दक्षिण कोरियाको हार टरेको हो ।

खेलको नवौँ मिनेटमा सन ह्युङ मिनले प्राप्त पेनाल्टी सदुपयोग गरेपछि दक्षिण कोरियाले अग्रता बनाएको थियो । ३७औँ मिनेटमा दक्षिण कोरियाका पार्क योङ वुबाट आत्मघाती गोल भएपछि जोर्डन खेलमा फर्कियो । पहिलो हाफको इन्जुरी समयमा याजन अल–नाइमतले गोल गर्दै जोर्डनलाई २–१ को अग्रतामा राखेका थिए ।

बराबरीसँगै दुई खेलबाट चार अंक जोडेको जोर्डन समूह ‘इ’ को शीर्ष स्थानमा उक्लिएको छ । समान खेलबाट चार अंक नै जोडेको दक्षिण कोरिया दोस्रो स्थानमा छ ।

शनिबार नै भएको समूहको अर्को खेलमा बहराइनले मलेसियाविरुद्ध १–० को जित निकालेको छ । बहराइनको जितमा अली मदनले इन्जुरी समयमा निर्णायक गोल गरे ।

जितसँगै दुई खेलबाट तीन अंक जोडेको बहराइन तालिकाको तेस्रो स्थानमा छ । समान खेल खेल्दा पनि अंकविहीन मलेसिया पुछारमा छ ।