काठमाडौं । दुईपटक सुपर ओभरमा पुगेको खेलमा अफगानिस्तानलाई १० रनले हराउँदै भारतले ट्वान्टी–२० शृंखलामा ‘क्लिन स्विप’ गरेको छ । बुधबार राति निर्धारित २० ओभर र पहिलो सुपर ओभरमा पनि स्कोर बराबर भएपछि दोस्रो सुपर ओभरबाट खेलको छिनोफानो भएको हो ।

भारतको जितमा कप्तान रोहित शर्माले शतकीय इनिङ्स खेले । योसँगै रोहित ट्वान्टी–२० अन्तर्राष्ट्रिय क्रिकेटमा सबैभन्दा धेरै शतक बनाउने ब्याटर समेत बनेका छन् । उनले भारतबाट हालसम्म पाँच शतक बनाएका छन् ।

बैंग्लोरमा भारतले टस जितेर २० ओभरमा चार विकेट गुमाउँदै २१२ रन बनाएको थियो । जवाफमा अफगानिस्तानले पनि ६ विकेट गुमाउँदै २१२ रन नै बनायो ।

यसपछि खेल सुपर ओभरमा पुग्यो । पहिलो सुपर ओभरमा अफगानिस्तानले १६ रन बनायो । जितका निम्ति १७ रनको लक्ष्य पाएको भारतले पनि १६ रन नै बनायो । खेल पुनः अर्को सुपर ओभरमा धकेलियो ।

दोस्रो सुपर ओभरमा भारतले अफगानिस्तानसामु ११ रनको लक्ष्य प्रस्तुत गरेको थियो । अफगानिस्तानले दोस्रो सुपर ओभरको तीन बलमा एक रन जोड्दै दुई विकेट गुमाएपछि भारत १० रनले विजयी भएको हो ।

भारतीय कप्तान रोहित खेलको ‘प्लेयर अफ दी म्याच’ चुनिए । भारतकै शिवम दुबे ‘प्लेयर अफ दी सिरिज’ घोषित भए । यसअघिका दुवै खेलमा भारत ६ विकेटले विजयी भएको थियो ।