काठमाडौं । इन्जुरी समयको अन्तिम मिनेटमा अली अलबुलाहयीले निर्णायक गोल गरेपछि एएफसी एसियन कपमा साउदी अरेबियाले विजयी सुरुआत गरेको छ । साउदीले मंगलबार भएको खेलमा ओमानविरुद्ध २–१ को कठिन जित निकालेको हो । 

कतारको खलिफा अन्तर्राष्ट्रिय रंगशालामा सम्पन्न खेलमा साउदीले खेलको अन्तिम समयसम्म पनि ओमानको दबाब झेलेको थियो । १४औं मिनेटमा प्राप्त पेनाल्टीलाई सदुपयोग गर्दै सलाह अल–याहयाइले ओमानलाई अग्रता दिलाएका थिए । यही गोलमा पहिलो हाफ र खेलको अन्तिम १५ मिनेटसम्म पनि ओमानले १–० को अग्रता बनाएको थियो । 

तर, ७८औं मिनेटमा अब्दुलरहमन घरिबले गोल गर्दै तीन पटकको च्याम्पियन साउदीलाई खेलमा फर्काएका थिए । 

इन्जुरी समयमा अलबुलाहयीले गोल गर्दै साउदीलाई २–१ को अग्रतामा राखे । अलबुलाहयीको यही गोल निर्णायक बन्दा साउदीले पुनरागमन जित निकाल्दै तीन अंक सुनिश्चित गरेको हो ।

जितसँगै तीन अंक जोडेको साउदी समूह ‘एफ’को दोस्रो स्थानमा छ । पहिलो खेलमै हार व्यहोरेको ओमान तालिकाको तेस्रो स्थानमा छ । 

मंगलबार नै भएको समूह ‘एफ’को अर्को खेलमा थाइल्यान्डले कीर्गिस्तानविरुद्ध २–० को सहज जित निकालेको छ । जितसँगै तीन अंक जोडेको थाइल्यान्ड समूहको शीर्ष स्थानमा छ । पराजित कीर्गिस्तान पुछारमा छ ।