काठमाडौं । पछिल्लो समय देशभर साहसिक खेलका नयाँ–नयाँ गतिविधि बढिरहेका छन् । मानिसहरूको आकर्षण पनि बढ्दो छ । बढ्दो मागसँगै काठमाडौंको चोभारमा क्यानोपी जीपलाइन सञ्चालमा आएको छ ।

तीन चरण गरेर खेल्न पाइने क्यानोपी जीपलाइनको कुल लम्बाइ करिब ४०० मिटर छ । सबै चरणको क्यानोपी जीपलाइन खेल्न करिब १० मिनेट लाग्छ । पहिलो चरणलाई  ‘एड्भेञ्चर’, दोस्रोलाई ‘डेयर डेभिल्स’ र तेस्रोलाई ‘द फन’ नामाकरण गरिएको छ ।

जीपलाइन खेल्ने क्रममा मन्जुश्रीले काटेको चोभारको आकर्षक गल्छी, जलविनायक मन्दिर, चोभारको गुम्बा, नवनिर्मित सुख्खा बन्दरगाह, चम्पादेवी र चन्द्रागिरि डाँडा, टौदहका साथै काठमाडौं तथा ललितपुरका सुन्दर पर्यटकीय ठाउँको दृश्यावलोकन गर्न सकिन्छ । टेकअफ टावरहरूबाटै सुन्दर हिमशृंखला देख्न सकिन्छ ।

जीपलाइन खेल्न कति लाग्छ ?
चोभारको मञ्जुश्री पार्कमा हालै सञ्चालनमा आएको जीपलाइन खेल्न दैनिक ३०० देखि ३५० जनासम्म मानिसहरू आउँछन् । हरेक दिन बिहान १० बजेदेखि साँझ ५ः३० बजेसम्म सञ्चालन हुने गर्दछ ।

तीन चरणको जीपलाइन खेल्न र फोटो भिडियोसहितको प्याकेजको प्रतिव्यक्ति शुल्क १५ सय रुपैयाँ तोकिएको छ । जोडीहरूलाई भने दुई हजार रुपैयाँ शुल्क तोकिएको छ ।

विद्यार्थीहरुलाई १० प्रतिशत र कीर्तिपुर नगरपालिकाको वडा नम्बर ६ का स्थानीयलाई २५ प्रतिशत छुटको व्यवस्था छ ।