काठमाडौं । नेपालका लागि पाकिस्तानका राजदूत अबरर एच हास्मी र परराष्ट्र मन्त्रलयकी सचिव सेवा लम्सालबीच भेटवार्ता भएको छ ।

आज परराष्ट्र मन्त्रालयमा भएको भेटमा नेपाल–पाकिस्तान सम्बन्धबारे छलफल भएको राजदूत हास्मीले ट्विटरमार्फत जानकारी दिएका छन् ।

उनका अनुसार भेटमा दक्षिण एसियाली क्षेत्रीय सहयोग संगठन (सार्क), नेपाल–पाकिस्तानबीचको शिक्षा, व्यापार, पर्यटन, जलवायु परिवर्तनका क्षेत्रमा सहयोग बढाउने विषयमा छलफल भएको छ ।

साथै विद्यमान द्विपक्षीय संयन्त्रलाई पुनः सक्रिय तुल्याउने सम्बन्धमा छलफल भएको थियो ।

राजदूत हास्मीले नवनियुक्त सचिव लम्साललाई पाकिस्तानका विदेश सचिव मुहम्मद साइरस क्बाजीले पठाएको पत्र हस्तान्तरण गरेका थिए ।