काठमाडौं । चालु आर्थिक वर्ष २०८०/०८१ को मंसिर मसान्तसम्म कायम रहेको विदेशी विनिमय सञ्चितिले १४.१ महिनाको वस्तु आयात गर्ने पुग्ने देखिएको छ । 

नेपाल राष्ट्र बैंकले बिहीबार सार्वजनिक गरेको तथ्यांक अनुसार आर्थिक वर्ष २०८०/०८१ को पाँच महिनाको आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चिति १४.१ महिनाको वस्तु आयात र ११.८ महिनाको वस्तु तथा सेवा आयात धान्न पर्याप्त रहने देखिएको हो । 

मंसिर मसान्तमा कुल विदेशी विनिमय सञ्चिति १७ खर्ब ६७ अर्ब ४ करोड पुगेको छ । गत असार मसान्तमा १५ खर्ब ३९ अर्ब ३६ करोड बराबरको कुल विदेशी विनिमय सञ्चिति थियो । विदेशी विनिमाय सञ्चिति असार मसान्तको तुलनामा १४.८ प्रतिशतले वृद्धि भएको राष्ट्र बैंकले जनाएको छ । 

कुल विदेशी विनिमय सञ्चितिमध्ये नेपाल राष्ट्र बैंकमा १५ खर्ब ५६ अर्ब २५ करोड पुगेका छ । बैंक तथा वित्तीय संस्था (नेपाल राष्ट्र बैंकबाहेक) सँग रहेको विदेशी विनिमय सञ्चिति मंसिर मसान्तमा ८.९ प्रतिशतले वृद्घि भई दुई खर्ब १० अर्ब ७९ करोड कायम भएको छ ।