काठमाडौं । संघीय मामिला तथा सामान्य प्रशासन मन्त्रालयका सचिव विनोदप्रकाश सिंहले संघीय निजामती ऐन नहुँदा कर्मचारी उत्साहित भएर काम गर्न नसकेको बताएका छन् । मंगलबार राष्ट्रिय सरोकार तथा समन्वय समितिको बैठकमा उनले यस्तो बताएका हुन् ।

“हामी पुरानै ऐनबाट चल्न बाध्य भएका छौँ । प्रदेश र स्थानीयमा मात्रै होइन, यहाँ संघीय निजामती कर्मचारीलाई हेरौँ न, त्यहाँ पनि स्पष्ट छैन,” उनले भने, “सात वर्ष भयो, निजामती सेवा ऐन आएको छैन । त्यो अवस्थामा कर्मचारीहरू धेरै उत्प्रेरित भएको देखिँदैन ।”

उनले निजामती कर्मचारी सरुवालाई व्यवस्थित बनाउन मन्त्रालय पूर्ण रूपमा सफल हुन नसकेको बताए । निजामती सेवा ऐनमा दुई वर्षमा मात्र सरुवा गर्ने भन्ने नियम रहेको उनले उल्लेख गरे । तर, विभिन्न कारणले तोकिएको समयसीमाभन्दा चाँडै सरुवा हुने गरेको उनले बताए ।

नीति र कानुन स्पष्ट नहुँदा कर्मचारी सरुवालाई व्यवस्थित बनाउन नसकिएको उनको भनाइ छ ।