काठमाडौं । सिनामंगलस्थित काठमाडौं मेडिकल कलेज केएमसी र आन्दोलनरत आवसीय चिकित्सकबीच वार्ता जारी छ । अहिले अस्पतालमा दुई पक्षबीच वार्ता चलिरहेको बताइएको छ । डा. विशद दाहालको विषय चाँडै निष्कर्षमा पुर्‍याइने अस्पतालका प्रबन्धक नारायणप्रसाद दाहालले जानकारी दिए । 

केएमसीले पीजी दोस्रो वर्षमा अध्ययनरत आवासीय चिकित्सक डा. दाहाललाई अनुशासन उल्लंघन गरेको र कर्तव्य पालना नगरेको भन्दै एक महिनाका लागि निलम्बन गरेपछि केएमसीमा आन्दोलन चर्किएको थियो । 

डा. विशद अध्ययन र काममा फर्कन चाहने र केएमसीले निलम्बन फिर्ता नगर्ने अडानपछि पुस १२ गतेदेखि उनीसहित पीजी पहिलो र दोस्रो वर्षका आवासीय चिकित्सक आन्दोलनमा थिए । 

यसैबीच शिक्षा विज्ञान तथा प्रविधि मन्त्रालयले सोमबार केएमसीलाई डा. विशदको निलम्बन फिर्ता लिन निर्देशन दिएको थियो । मन्त्रालयका प्रवक्ता शिवकुमार सापकोटाका अनुसार स्वास्थ्य सचिव सुरेश अधिकारीले केएमसी प्रशासनलाई फोनमार्फत तत्काल निलम्बन फुकुवा गर्न निर्देशन दिएका थिए ।