काठमाडौं । चलचित्र ‘महाजात्रा’को फर्स्ट लुक्स पोस्टर सार्वजनिक गरिएको छ । पोस्टरमा अभिनेता हरिवंश आचार्यसँगै विपीन कार्की, रवीन्द्रसिंह बानियाँ र रवीन्द्र झा छन् । विपीन र दुई रवीन्द्रले अभिनेता आचार्यलाई ह्वीलचेयरमा कतै लगिरहेको पोस्टरमा देखिन्छ । 

पोस्टरले हरिवंश बन्दी बनाएको संकेत गरेको छ ।  पोस्टरमार्फत सिनेमाको कथासार झल्काउने प्रयास गरेको कार्यकारी निर्माता समेत रहेका कलाकार रवीन्द्रसिंह बानियाँले जानकारी दिए ।  

आपतकालीन रुपमा प्राप्त हुने अवसर व्यवस्थापन गर्दा आइपर्ने समस्यालाई रोचक रूपमा प्रस्तुत गरिएको निर्माण पक्षले बताएको छ । 

प्रदीप भट्टराईको लेखन तथा निर्देशन रहेको चलचित्रमा हरिवंश, विपीन र दुई रवीन्द्रसँगै प्रकाश घिमिरे, वर्षा राउत, अर्जुनजंग शाही, राजाराम पौडेल, प्रवीण खतिवडा, दिव्यदेव, सुमन कार्की, शिशिर बाङ्देल, गौमाया गुरुङ, अरविन खड्कालगायतको पनि अभिनय छ । 

चलचित्रको निर्माता म्याक्स दीपेश खत्री र यज्ञश्वर पौडेल हुन् । चैत ९ गते प्रदर्शन हुने ‘महाजात्रा’ ‘जात्रा’ र ‘जात्रै जात्रा’पछि षट्कोण आर्ट्सले निर्माण गरेको हो ।