काठमाडौं । इटालियन सिरी ‘ए’ मा युभेन्ट्सले एएस रोमाविरुद्ध १–० को कठिन जित निकालेको छ । शनिबार घरेलु मैदान एलियन्ज रंगशालामा युभेन्टसलाई जित दिलाउन एड्रियन राबियोटले गरेको गोल निर्णायक बन्यो ।

राबियोटले खेलको ४७औँ मिनेटमा गोल गर्दै घरेलु टिमलाई अग्रतामा राखेका थिए । यही गोल निर्णायक बन्दा युभेन्ट्सले तीन अंक सुनिश्चित गरेको हो ।

जितसँगै १८ खेलमा ४३ अंक जोडेको युभेन्ट्स दोस्रो स्थानमा छ । युभेन्ट्स शीर्ष स्थानको इन्टर मिलानभन्दा दुई अंकले पछि छ । समान खेलबाट ४५ अंकसहित इन्टर शीर्ष स्थानमा छ । पराजित रोमा भने समान खेलबाट २८ अंकसहित तालिकाको सातौं स्थानमा छ ।

लिगअन्तर्गकै शनिबार राति नै भएका अन्य खेलमा इन्टर मिलानले सासौलो, सालेर्निटानले भिरोना र एट्लान्टाले लिसमाथि समान १–० को जित निकाले । यस्तै, लाजियोले फ्रोसिनोनेलाई ३–१ र युडिनेसले बोलोग्नालाई ३–० ले हराउँदा काग्लियारी र इम्पोली गोलरहित बराबरीमा रोकिए ।