काठमाडौं । रातको समय, चकमन्न सहर । एउटा पुरुष उभिरहेको छ । एक हातले पाउरोटी बोकेको पुरुष अर्को हातले मुस्किलले लाज छोपेको कपडाको टालो समाइरहेको छ । पाउरोटी कसैले उसको हातमा भर्खरै हाल्दिएको छ । 

टाँक नभएको मैलिएर काती भएको सट लगाएको छ । लगाएको पनि के भन्नु भिरेको छ । झुस्स दारीजुंगा, वर्षौंसम्म पानी नपरेको जुङरुंग कपाल । शरीरभरी मैलाेको लेग्रैलेग्रा । कमजोरीले सिधा हुन पनि नसकेको शरीर । भलै सिक्सप्याक बडी भने देखिन्छ । यो हुलिया अरु कसैको नभएर अभिनेता सौगात मल्लको हो । 

यो लुक्स सौगातले गोरखपुरमा तयार गरेका थिए । “विश्वमै यो वर्ष अधिक गर्मी छ भन्ने हल्ला चलिरहेका बेला म यो क्यारेक्टर निर्माण गरिरहेको थिएँ,” सौगात बाह्रखरीसँग भन्छन्, “गर्मीको समयमा यस्तो लुक्समा बस्न निकै कठिन भइरहेको थियो ।” तर केही राम्रो काम आउँदै छ भन्ने कुराल भने रमाइलो अनुभूति पनि सँगसँगै भइरहेको स्मरण गर्छन् सौगात । 

करिब ३० दिन यो क्यारेक्टरमा बसे उनी । कपडा मैलो चाहिएको थियो । त्यसैले उनले सडकमा देखेका केही व्यक्तिको तस्बिर खिचेका थिए । 

“मैले खिचेका तस्बिर हेरेर प्रोडक्सनले कपडा जुटायो । मैलो कपडा चाहिएकाले मैले थुप्रै दिन यो कपडा लगाएँँ । धुलोमा बसेँ । गोबर पनि दल्ने काम भयो,” सौगात भन्छन्, “तर लुगा कहिल्यै टक्टक्याइनँ । धुने त कुरै भएन ।” 

कहिल्यै नलगाएको कातीजस्तो कपडा लगाएर बस्थे । नुहाउँदा  सफा देखिन्थ्यो भन्ने डर थियो । त्यसैले नुहाएनन् । “शरीर चिलाउँथ्यो । खटिरा आउँथ्यो । जहाँ खटिरा आउँथ्यो र चिलाउँथ्यो, त्यहाँ पानीले पुछ्थेँ,” उनी भन्छन्, “पछि–पछि त खटिराए आएर निकै दुःख पाएँ । शरीरमा खटिरा आएको ठाउँमा पुछे पनि कपाल नुहाउँदा सफा देखिन्थ्यो । त्यसैले एक महिनासम्म कपाल धुइनँ ।”  

चलचित्र ‘अगस्त्य–भाग १’ का लागि उनले निर्माण गरेको चरित्र हो । सौगात भर्सटाइल अभिनेता हुन्, भन्ने यो लुक्सले पनि पुष्टि गर्छ । उनले फरक लुक्सका लागि यो सिनेमामा निकै मिहिनेत गरेको देखिन्छ ।   

चलचित्र ‘अगस्त्य–भाग १’ मा सौगात मल्ल, नाजिर हुसेन, मलिका महत, प्रमोद अग्रहरी, विजय बराल, रवीन्द्र झालगायत कलाकार मुख्य भूमिकामा छन् । 

सौरभ चौधरीको लेखन तथा निर्देशन रहेको चलचित्रको निर्माता प्रकाश मल्ल, अनिष तामाङ र विश्वप्रकाश गोचन छन् ।