काठमाडौं । सत्तारूढ दल नेपाली कांग्रेसले सरकारको समीक्षा गर्न बोलाएको केन्द्रीय समिति बैठकमा नेताहरूले पार्टीबाट सरकारमा गएका मन्त्रीहरूले गुटको हितमा मात्रै काम गरेको आरोप लगाएका हुन् । गुटका लागि काम गर्ने मन्त्रीहरूको ‘अपजस’को भारी आफूहरूले नबोक्ने उनीहरूको भनाइ छ ।
बैठकको पहिलो दिन बिहीबार पार्टीबाट सरकारमा सहभागी मन्त्रीहरूले आफूले गरेका कामको ब्रिफिङ गर्ने भनिएको थियो । तर, स्वास्थ्यमन्त्री मोहन बस्नेतबाहेक अरूले बोलेनन् । मन्त्रिपरिषद्को बैठक रहेको भन्दै सबै मन्त्रीहरू हिँडेका थिए ।
बैठकमा बोल्ने केन्द्रीय सदस्यहरूले सरकारमा 'कांग्रेस छ र ?' भन्ने आशयबाट धारणा राखेका थिए । उनीहरूले कांग्रेस सत्तामा भए पनि 'के हो उपलब्धि' भन्दै प्रश्न गरे ।
उनीहरूले देशमा भ्रष्टचार बढेको, सुशासन सकिएर दण्डहीनता मौलाएको, देश काण्डैकाण्डमा फसेको बताएका थिए । ‘यस्तो विषम अवस्थामा कांग्रेस सत्तामा भए पनि के चाहिँ अनुभुति जनताले गर्न पाए ?,’ उनीहरूको प्रश्न थियो ।
केन्द्रीय सदस्य राजीव कोइरालाले गठबन्धनको सरकार असफल हुने तर अपजस जति केन्द्रीय सदस्यले बोकिदिनुपर्ने भन्दै आक्रोश पोख । ‘‘हाम्रा मन्त्री गुटको आधारमा काम गर्ने भए,” कोइरालाले भनेका थिए, “अपजस चाहिँ हामीले बोकिदिनुपर्ने ? जस कसले लिने ?”
अर्का केन्द्रीय सदस्य मुक्ताकुमारी यादवले कांग्रेस सरकारमा भए पनि कांग्रेसका नेता/कार्यकर्ताले नै अनुभूति गर्न नपाएको गुनासो पोखिन् । “हाम्रा मन्त्री सरकारमा छन् । तर, खै मन्त्री सरकारमा भएको अनुभूति नै भएन,” यादवको भनाइ उद्धृत गर्दै एक केन्द्रीय सदस्यले बाह्रखरीसँग भने ।
बैठकमा सरकारले प्रभावकारी काम गर्न नसकेको भन्दै संस्थापइतर समूह निकट केन्द्रीय सदस्यले खुलेर भनाइ राखे । उनीहरूको चासो सरकार असफल भए जनतामा कांग्रेसको सकारात्मक सन्देश जाँदैन भन्ने रहेको सांसदसमेत रहेका एक केन्द्रीय सदस्य बताउँछन् ।
“सांसद छु विरोधमा बोलौँ भने मन्त्री बन्न नपाएको झोकमा बोलिस् भन्छन् । मैले भित्र कुरा चाहिँ राखिनँ,” उनले भने ।
गण्डकी प्रदेशका पूर्वमुख्यमन्त्री कृष्णचन्द्र नेपाली पोखरेलले सरकारको प्रतिरक्षा गर्न सक्ने अवस्था नभएको बताए ।
प्रधानमन्त्रीले मन्त्री फेर्न चाहे कांग्रेस बाधक नबन्ने
पार्टी प्रचार विभाग प्रमुख मीन विश्वकर्माले प्रधानमन्त्रीले मन्त्रीहरू हेरफेर गर्न चाहे कांग्रेस बाधक नबन्ने बताए । कसलाई मन्त्री बनाउने भन्ने विषय प्रधानमन्त्रीको निर्णयमा भर पर्ने भन्दै उनले कांग्रेस बैठकमा यस विषयमा छलफल बाँकी रहेको उल्लेख गरे ।
“मन्त्री हेरफेरको विषयमा बैठकमै छलफल भइसकेको छैन । तर, यो संसदीय व्यवस्था हो । प्रधानमन्त्रीलाई आफ्नो अनुकूलको मन्त्रिपरिषद् आवश्यक पर्छ । एकल सरकार भएको भए प्रधानमन्त्रीले जति बेला पनि मन्त्रीहरू हेरफेर गर्न सक्नुहुन्थ्यो,” उनले भने ।
विश्वकर्माले प्रधानमन्त्रीले गठबन्धनका दलहरूसँग छलफल गरेर जुनसुकै बेला पनि मन्त्रीहरू हेरफेर गर्न सक्ने भएकाले त्यसमा कांग्रेस बाधक नबन्ने धारणा राखे ।
साथै उनले सरकारको सफलता र असफलताको विषयमा प्रधानमन्त्रीकै हातमा निर्भर रहेको पनि बताए ।
राष्ट्रियसभाको चर्चा– चुनाव हारेकालाई ल्याउने भए मेरो नाम किन नपर्ने ?
केन्द्रीय समिति बैठकमा राष्ट्रियसभा निर्वाचनमा उमेदवार सिफारिसलाई लिएर पनि चर्को आलोचना भएको छ । अघिल्लो वर्ष तीन तहमा भएको निर्वाचन हारेकाहरूको नाम सिफारिस भएको भन्दै केन्द्रीय सदस्यहरू आक्रोशित भएका छन् ।
सबै प्रदेश कमिटीहरूले अघिल्लो वर्षको प्रतिनिधिसभा निर्वाचन हारेकाहरूको नाम राष्ट्रिय सभा सदस्यका लागि सिफारिस गरेका छन् । जसमा कृष्णप्रसाद सिटौला, सुजाता कोइराला, पुष्पा भुसाल, भरत शाहलगायत छन् ।
केन्द्रीय सदस्यहरूले उमेदवार सिफारिस र छनोटको मापदण्ड के हो भन्दै प्रश्न उठाए । उनीहरूले हारेको मान्छेलाई सिफारिस गर्ने भए आफ्नो नाम किन सिफारिसन हुने भन्दै प्रश्न गरे ।
केन्द्रीय सदस्य देवेन्द्रराज कँडेलले राष्ट्रियसभामा ल्याउने उमेदवारको विषयमा खुला र सबैका लागि लागु हुने मापदण्ड बनाउन माग गरे । नेता कँडेलले चुनाव हारेकाहरूलाई राष्ट्रियसभामा उमेदवार बनाउने वा नबनाउने भन्ने विषयमा पार्टीले स्पष्ट मापदण्ड बनाउनुपर्ने बताए ।
“यदि हारेकाहरू नै राष्ट्रियसभामा आउने हो भने म किन नआउने ?,” प्रश्न गर्दै कँडेलले भने, “पार्टीका नाममा गलत व्यक्तिको संरक्षण नगरियोस् । दण्ड र पुरस्कारको व्यवस्था पार्टीमा लागु होस् ।”
केन्द्रीय सदस्यहरूले कसैले अवसर पाइरहने, कसैले अवसर नै नपाएर अन्याय भएको गुनासो गरे । केन्द्रीय सदस्य दिलेन्द्रप्रसाद बडुले नयाँ उमेदवारलाई प्राथमिकता दिनुपर्ने धारणा राखे ।
“अहिलेसम्म नपाएकालाई प्राथामिकता दिऔँ ।कोही दोहोरिने, कोही केही नपाउने नहोस्,” उनले बैठकमा भने ।
अर्का केन्द्रीय सदस्य कर्ण बुढाले पनि धेरै अवसर पाएकाहरूलाई चुप लागेर बसिदिन आग्रह गरे । साथै उनले कर्णाली प्रदेशलाई प्राथामिकता दिन पनि अनुरोध गरे ।
“धेरै अवसर लिएकाले अब अवसर नलिऔँ । नयाँलाई अवसर दिऔँ,” उनले थपे ।
अर्का केन्द्रीय सदस्य राजीव कोइरालाको तर्क पनि फरक थिए ।
भूकम्प पीडितका लागि ४०७ टहरा
केन्द्रीय कार्यसमिति बैठकमा जाजरकोटमा भूकम्प प्रभावितलाई निर्माण गरिएको अस्थायी टहराको विवरण पनि प्रस्तुत गरिएको थियो ।
सहमहामन्त्री जीवन परियारले अहिलेसम्म ४०७ वटा टहरा निर्माण गरिएको बताए । पार्टीका तर्फबाट केन्द्रीय सदस्य प्रदीप पौडेलको नेतृत्वमा १२५, मोहन आचार्यको नेतृत्वमा ११३, योगेन्द्र चौधरीको नेतृत्वमा २५ टहरा निर्माण गरिएको उनले जानकारी दिए । केन्द्रीय सदस्यहरू नैनसिंह महर, कुन्दनराज काफ्ले र राजीवविक्रम शाहको नेतृत्वमा दुई टहरा बनाइएको उनले बताए ।
केन्द्रीय सदस्य राजीव ढुंगानाको नेतृत्वमा तीन, कर्णाली प्रदेश कार्यसमितिको नेतृत्वमा ५२, बाँके कांग्रेस सभापतिको नेतृत्वमा १० टहरा निर्माण गरिएको जनाइएको छ ।
धरानका पूर्वमेयर तिलक राईको नेतृत्वमा ६ र ट्रेड युनियन कांग्रेसको नेतृत्वमा ७० टहरा निर्माण गरिएको विवरण उनले बैठकमा प्रस्तुत गरे । कांग्रेसको केन्द्रीय समितिले टहरा बनाउन निर्देशन दिएको थियो ।
केन्द्रीय समितिको दोस्रो दिनको बैठक शुक्रबार ११ बजे सुरु हुने छ ।
