पोखरा । २५औँ पोखरा सडक महोत्सव (स्ट्रीट फेस्टिवल) बिहीबारदेखि सुरु भएको छ । अंग्रेजी नयाँ वर्षको अवसर पारेर रेस्टुरेन्ट एन्ड बार एसोसिएसन (रेबान)ले हरेक वर्ष सडक महोत्सवको आयोजना गर्दै आएको छ ।

पाँच दिनसम्म चल्ने महोत्सवमा करिब पाँच लाख अवलोकनकर्ता भित्र्याउने रेबानको लक्ष्य छ । रेबानका अध्यक्ष नरेश भट्टराईले महोत्सवलाई सफल बनाउन विभिन्न प्याकेजसहित प्रचारप्रसारलाई तीव्र पारिएको बताए ।

“क्रिसमसदेखि नै योपटक केही दिन बिदा परेकोले पोखरामा बढी पाहुना आउने अपेक्षा लिएका छौँ । होटेल बुकिङ समेत सुरु भइसकेको छ । आन्तरिक पाहुनाको चलहपहलले हामी उत्साही भएका छौँ,” उनले भने, “आन्तरिक पाहुना पोखरा भित्र्याउने यो नै सबैभन्दा महत्त्वपूर्ण र भव्य इभेन्ट हो ।”

महोत्सव लेकसाइडको तीन किलोमिटर क्षेत्रमा सञ्चालन हुने उनले जानकारी दिए ।