काठमाडौं । नेकपा (एमाले)की सांसद विद्या भट्टराईले स्थानीय तह आफैँले पाठ्यक्रम बनाउन सक्ने व्यवस्था गर्नुपर्ने बताएकी छन् ।

प्रतिनिधिसभाअन्तर्गतको शिक्षा, स्वास्थ्य तथा सूचना प्रविधि समितिको आइतबारको बैठकमा उनले विद्यालय शिक्षा विधेयकमा स्थानीय तह आफैँले आफ्नो पाठ्यक्रम बनाउने व्यवस्था गर्नुपर्ने बताएकी हुन् । उनले पाठ्यक्रमको सन्दर्भमा संघले स्थानीय तहलाई निर्देशन दिने हक नराख्ने तर्क गरिन् ।

उनले संविधानको कार्यान्वयन गर्ने भए त्यसको मर्मसँग बाझिने गरी ऐन बनाउन नहुने बताइन् । संविधानको आधारभूत र मौलिक मर्मलाई बिर्सिएर ऐन बनाएर उद्देश्य पूरा गर्न नसकिने भन्दै उनले यसतर्फ सबै गम्भीर हुनुपर्नेमा जोड दिइन् ।

उनले शिक्षक महासंघसँग सरकारले गरेको सम्झौताका बारेमा समितिलाई जानकारी गराइनुपर्ने माग पनि गरिन् । न्युज एजेन्सी नेपाल