विराटनगर । संघीय सरकारका संस्कृति, पर्यटन तथा नागरिक उड्डयनमन्त्री सुदन किरातीलाई  अपदस्थ गर्न कोसी प्रदेश सभामा माग उठेको छ । राष्ट्रिय प्रजातन्त्र पार्टी (राप्रपा)को तर्फबाट विशेष समयमा बोल्दै सांसद सविना बजगाईंले मन्त्री किरातीलाई अपदस्थ गर्न माग गरेकी हुन् ।

उनले मन्त्री किरातीलाई आफूहरूलाई जेल हालेर देखाउन पनि चुनौती दिइन् । “नेपाल सरकारका मन्त्री सुदन किरातीले क्रिस्चियन नमान्ने मानिस देशद्रोही हो भनेर दिएको धम्कीप्रति हाम्रो आपत्ति छ । तथ्यांक अनुसार नेपालमा दुई प्रतिशत क्रिस्चियन छन् । अब हामी ९८ प्रतिशत अन्य धर्म मान्ने के देशद्रोही हौँ ? गैरजिम्मेवारीपूर्ण ढंगल मन्त्रीबाट भावना आउनु दुःखद हो । किरातीलाई अपदस्थ गरियोस्,” उनले भनिन् । 

उनले नेपाल सनतानीहरूको देश भएको भन्दै पशुपतिनाथ, मुक्तिनाथ र स्वयम्भूहरू आदर्श विश्वासका धरोहर भएको बताइन् ।

“सहिष्णु समाजलाई हरेक बहानामा आहत गराउनु नियोजित होइन र ? राज्यको उच्च ओहोदामा रहेकाले त पटक्कै गर्नु हुँदैन । दम्भी भावना राख्दै गल्ती महसुस नगर्नुले सामाजिक सद्भाव बिथोल्न नियोजितरूपमै तयारी रहेको देखिएको छ । नेपाल सरकारका मन्त्रीको राजीनामा माग गर्दछु,” उनले भनिन् ।