जनकपुर । अर्थमन्त्री समेत रहेका नेपाली कांग्रेसका प्रवक्ता डा. प्रकाशशरण महतले पार्टीको आधारभूमि मधेस प्रदेश भएको बताएका छन् ।

बिहीबार पार्टीको प्रथम प्रदेश सम्मेलनलाई सम्बोधन गर्दै उनले लोकतन्त्र स्थापनाका लागि मधेसले ठूलो संख्यामा ज्यानको आहुति दिने सहिदलाई जन्माएको उल्लेख गरे ।

मधेसबाट रामनारायण मिश्र, महेन्द्रनारायण निधि, सरोज कोइराला, शेख इद्रिस लगायतले लोकतन्त्र स्थापना र कांग्रेस पार्टी निर्माणमा महत्वपूर्ण भूमिका खेलेको उनको भनाइ थियो ।

“विद्यार्थी नेता कामेश्वर, कुशेश्वर, दुर्गानन्द झा लगायतको पनि नेपाली कांग्रेस निर्माणमा र लोकतान्त्रिक आन्दोलनको उर्वरभूमि यो क्षेत्रलाई बनाउन महत्वपूर्ण भूमिका दिनुभएको थियो,” डा. महतले भने ।

उनले मधेसमा पार्टी बलियो भएमात्र कांग्रेस बलियो हुने जिकिर गरे । कांग्रेस बहुमतको पार्टी बन्ने भए मधेस बलियो हुनुपर्ने धारणा उनको थियो ।

“मधेस प्रदेश बलियो भयो भने नेपाली कांग्रेस बलियो हुन्छ । मधेस प्रदेशमा कांग्रेसले एक्लै बहुमत ल्याउने परिस्थिति बनायौं भने, देशैभरी कांग्रेसले बहुमत ल्याउँछ,” महतले थपे, “त्यसका लागि नेपाली कांग्रेस पार्टीभित्र एकताको आवश्यकता छ ।”

उनले आरोप–प्रत्यारोपबाट नभई संस्थागत निर्णय गर्ने, छलफल गर्ने र छलफलबाट जे निष्कर्ष निस्कन्छ, त्यो लिएर एक स्वरमा जनताको बीचमा जानुपर्ने धारणा राखे ।