काठमाडौं । संघीय संसद्का कार्यबाहक महासचिव पद्मप्रसाद पाण्डेयको छ वर्ष उमेर घटाएर १० वर्ष प्रयोग गरेको नागरिकताबाट पासपोर्ट पनि लिएको खुलेको छ ।

जिल्ला प्रशासन कार्यालय पाल्पाबाट प्राप्त विवरणमा उनले २०६९ साउन २ गते मेसिन रिडेबल पासपोर्ट लिएका थिए ।

उनले सन् २०१२–७–१७ अर्थात् बि.सं. २०६९ साउन २ गते जिल्ला प्रशासन कार्यालय पाल्पाबाट पासपोर्ट लिएको खुलेको हो । पछिल्लोपल्ट लिएको नागरिकतामा ३९१०११/१५५ नम्बर अनुसार उनले पासपोर्ट लिएको जिल्ला प्रशासन कार्यालय पाल्पा स्रोतले जानकारी दियो ।

संसद्का कार्यवाहक महासचिव पाण्डेयको नागरिकतामा ‘गडबडी’

“साधारण पासपोर्ट जारी भएको छ,” स्रोतले बाह्रखरीसँग भन्यो, “जारी मिति २०६९ साउन २ गते उल्लेख छ भने पासपोर्ट नम्बर ०६०१८३७० रहेको छ ।”

पाण्डेयले यसअघि छ वर्ष उमेर घटाएर नागरिकता लिएको १० वर्षपछि पुनः पुरानै कायम गरेको समाचार बाह्रखरीमा सार्वजनिक भएको थियो ।

बाह्रखरीलाई जिल्ला प्रशासन कार्यालय पाल्पामार्फत् प्राप्त टिप्पणी र आदेशअनुसार उनको पहिलो नागरिकतामा जन्ममिति २०२६ असोज १५ गते कायम गरिएको छ । तर पछि उनले २०६६ साल भदौ ८ गते पाल्पाबाटै लिएको अर्को नागरिकतामा जन्ममिति २०३२ पुस २६ गते उल्लेख गरिएको छ ।

पछिल्लो नागरिकता उनले १० वर्षसम्म कायमै राखे । त्यस बीचमा उनले लिने तालिम, भ्रमणलगायतका काम गरेको स्रोतले जानकारी दिएको छ । १० वर्षपछि फेरि उनले पुरानै नागरिकता कायम गराए ।

नयाँ नागरिकता बनाएको ३ वर्षपछि उनले पाल्पाबाटै पासपोर्ट लिएको पाइएको हो । तर पाण्डेयले यसअघि बाह्रखरीसँग कुरा गर्दै ‘भूलबस’ नागरिकता लिएको बताएका थिए । उनले आफ्नो नागरिकता पुरानै कायम गरिपाउँ भनी नयाँ नागरिकता लिएको नौ वर्षपछि निवेदन दिएका थिए ।

तर त्यसबेला जिल्ला प्रशासन कार्यालय पाल्पाले करिब ६ महिनासम्म उनको निवेदन रोकेर राखेको पाइएको छ । २०६६ भदौ ८ गते नयाँ नागरिकता लिएका पाण्डेले २०७५ फागुन ३० गतेमात्रै निवेदन दिएको जिल्ला प्रशासन कार्यालय पाल्पाको रेकर्डमा उल्लेख छ ।

पछि २०७६ भदौ २३ गते प्रशासकीय अधिकृत रमा श्रेष्ठको हस्ताक्षरमा पुरानो नागरिकता प्रमाणपत्र रद्द गरेर नयाँ कायम गरेको देखिएको छ । २०७५  फागुनमा निवेदन दिए पनि पाण्डेयले २०७६ भदौ २३ गते पुरानै नागरिकता कायम गरेका छन् । उनले पुरानै नम्बरको नागरिकता कायम गरेका हुन् । 

उक्त १० वर्षको अवधिमा उनले छ वर्ष उमेर घटाइएको नागरिकता प्रयोग गरेका थिए ।

जिल्ला प्रशासन कार्यालय पाल्पाले तत्कालीन द्वन्द्वका क्रममा प्रशासन कार्यालयमा रहेका सम्पूर्ण अभिलेखहरू जलेर नष्ट भएको कारणले कुनै पनि अभिलेख नरहेको र दुवै सक्कली नागरिकताको प्रमाणपत्रसहित भूलबस विवरण फरक परेको भनी निवेदकबाट निवेदन प्राप्त भएकाले २०६६ भदौ ८ गते जारी भएको नागरिकता खारेज गरेर पुरानै कायम गरिएको उल्लेख गरेको छ ।

उनले लिएका दुवै नागरिकता नम्बर पनि फरक फरक रहेका थिए । पहिलोपल्ट लिएको नागरितामा उनको नागरिकता प्रमाणपत्र नम्बर ३५ रहेको छ भने पछिल्लोपल्ट लिएको नागरिकतामा ३९१०११/१५५ उल्लेख गरिएको छ ।

यस विषयमा बाह्रखरीले राखेको जिज्ञासामा पाण्डेयले ‘बाइ मिस्टेक’ नागरिकतामा जन्ममिति फरक परेको बताएका थिए । उनले आफ्नो नागरिकता हराएको र पछि कोठा सर्दा पुरानै नागरिकता भेटिएकाले सोही कायम गरिएको बताएका थिए ।

संघीय संसद्का महासचिव डा. भरत गौतमले पदबाट राजीनामा दिएपछि प्रतिनिधि सभाका सभामुख देवराज घिमिरे र राष्ट्रिय सभा अध्यक्ष गणेशप्रसाद तिमिल्सिनाले पाण्डेयलाई महासचिवमा सिफारिश गरेका थिए । तर, राष्ट्रिय अध्यक्ष तिमिल्सिना अवकाशउन्मुख भएको हुँदा नियुक्ति रोकिएको थियो । 

त्यहीबीचमा बाह्रखरीमा नागरिकता उमेर विवाद आएपछि उनको नियुक्ति अनुमोदन गर्ने सवालमा राष्ट्रपति कार्यालय अलमलमा परेको हो । त्यहीबीचमा उनलाई संसद्ले कार्यबाहक महासचिवको जिम्मेवारी दिएको छ ।

राष्ट्रपति कार्यालयले उनलाई नियुक्ति नदिँदा संसद् र राष्ट्रपति कार्यालयबीच मनमुटाव सिर्जना भएको छ । उनै पाण्डेयलाई महासचिव नबनाइए आफू अदालत जाने चेतावनी सभामुख देवराज घिमिरेले दिएका छन् ।