काठमाडौं । डा. गोविन्द केसी दुई बुँदे माग राखेर २१औँ 'सत्याग्रह'मा छन् । शुक्रबारदेखि कैलालीको धनगढीस्थित लक्ष्मीनारायण मन्दिरको धर्मशालामा बसेका उनको तेस्रोदिन आइतबार स्वास्थ्यमा समस्या देखिएको छ ।

१० दिनअघि पित्तथैलीको शल्यक्रिया गरेका डा. केसीको ब्लड प्रेसर लो तथा पिसाबमा किटोनको लेभल बढी देखिएको छ । कमजोरीका कारण आइतबारदेखि बोलचाल समेत कम गरेका छन् ।चिसोका कारण उनलाई धर्मशालाकै सानो कोठामा सारिएको छ ।

डा. केसीलाई आजै साँझबाट साधारण स्लाइन दिने तयारी भएको उनका सहयोगी डा. अमृत जैशीले बताए ।

स्वास्थ्य अवस्थाका कारण ७२ घण्टे अनसन बस्ने निर्णय गरेका डा. केसीले सोमबार दिउँसो अनशन तोड्ने तयारी गरेका छन् ।

सशस्त्र द्वन्द्वकालमा भएका जघन्य तथा मानवताविरोधी अपराधका दोषीहरूलाई दण्डित गर्दै मृतक, घाइते र बेपत्ताका परिवारलाई न्याय हुने गरी संक्रमणकालीन न्याय प्रक्रिया शीघ्र टुंगोमा पुर्‍याउनुपर्ने र  यसअघि आफूसित भएका सम्झौताहरू कार्यान्वयन गरिनुपर्ने माग राखेर केसी २१औँ पटक सत्याग्रहमा बसेका हुन् ।