काठमाडौं । हाल मुलुकभरका बालगृहमा ११ हजार दुई २०० बालबालिका संरक्षित छन् । आव २०७९/८० मा ५० वटा बालगृह बन्द भएकामा ५१ बालगृृह थप भई हाल ४१८ वटा बालगृह सञ्चालनमा छन् । मुलुकभर पाँच हजार १४४ बालक र छ हजार ५८ बालिका गरी जम्मा ११ हजार २०२ बालबालिका बालगृहमा संरक्षित छन् । 

राष्ट्रिय बाल अधिकार परिषद्का अनुसार कोशी प्रदेशका आठ जिल्लामा २९ बालगृह सञ्चालनमा रहेका छन् । मधेस प्रदेशका पाँच जिल्लामा १३ बालगृह सञ्चालनमा छन् । वाग्मती प्रदेशका दश जिल्लामा २९६ बालगृह सञ्चालनमा छन् जहाँ तीन हजार ३९९ बालक र चार हजार ४१५ बालिकाले अभिभावक पाएका छन् । 

गण्डकी प्रदेशका ६ जिल्लामा ३७ बालगृह सञ्चालनमा रहेका छन् । जसमा ५३५ बालक र ६२३ बालिका गरी जम्मा एक हजार १५८ बालबालिका संरक्षित छन् । 

लुम्बिनी प्रदेशका सात जिल्लामा १९ बालगृह सञ्चालनमा छन् । जसमा २९१ बालक र २५६ बालिका गरी जम्मा ५४७ बालबालिका संरक्षित छन् ।

कर्णाली प्रदेशका ६ वटा जिल्लामा दश बालगृह सञ्चालनमा छन् । सुदूरपश्चिम प्रदेशका तीन जिल्ला रहेका १४ बालगृहमा १७८ बालक र १३७ बालिका गरी जम्मा ३१५ जना बालबालिकाले आश्रय पाएका छन् । आर्थिक वर्ष २०७८/७९ मा मुलुकभर ४३ जिल्लामा सञ्चालित ४१७ वटा बालगृहमा दश हजार ९०५ बालबालिका संरक्षित छन् । 

परिषद्ले आव २०७९/८० मा सम्बन्धित स्थानीय तहसँगको समन्वय र सहकार्यमा १२ वटा जिल्लाका १२४ वटा बालगृहको अनुगमन गरिएको बताएको छ । सोही आवमा अभिभावक भएका २३८ बालक र २९० बालिका गरी जम्मा ५२८ जना बालबालिकाको परिवारिक पुनर्मिलन गरिएको र प्रचलित मापदण्डविपरीत सञ्चालनमा रहेका दुईवटा बालगृहबाट २७ जना बालक र १४ जना बालिकाको उद्धार गरिएको थियो । रासस