काठमाडौं । केही महिनाको ‘ग्याप’पश्चात् नेपाली कांग्रेसको इतर समूहका नेता डा. शेखर कोइरालाले आफ्नो समूहको बैठक बोलाए । मंसिर २६ गते मंगलबारका लागि काठमाडौंको अनुपम फूडल्यान्डमा समूहको बैठक बोलाइयो । तर, बैठक बस्ने समाचार सञ्चारमाध्यममा आएसँगै विवाद जस्तै देखियो । 

खासमा शेखरले बैठक बोलाउँदा महामन्त्री गगनकुमार थापासँग सल्लाह नभएको कुरा बाहिर आयो । मंसिर २६ गतेका लागि कार्यक्रम तय भइसकेको अवस्थामा थापा बैठकमा नजाने विषय बाहिर आए । यो घटनाले शेखर समूहमा एकरूपता नभएको चर्चा बाहिरियो । 

शेखरले सल्लाह नगरी बैठक बोलाएको समूहका नेताहरूले बताए । तर, शेखर निकट एक नेता एकलौटी सल्लाहबिनै बैठक बोलाइएको भन्ने कुरा ठाडै अस्वीकार गर्छन् । 

“हामीले बोलाउन उहाँलाई फोन गरेको हो । शेखर दाइले फोन गर्दा गगन दाइको अफ थियो । दिनेशजीले फोन गर्दा फोन उठेन । उहाँको सचिवालयमा खबर गर्दा यता खबर गरेर फोन गर्छु भन्नुभयो । तर, फोन आएन,” ती केन्द्रीय नेताले भने । 

यो घटनापछि कांग्रेस वृत्तमा शेखर–गगन सम्बन्धलाई लिएर बहस भए । त्यसपश्चात् केन्द्रीय सदस्य अर्जुननरसिंह केसीले संवाद अघि बढाए । 

“गगनजीसँग सल्लाह नभइ समय तय भएको रहेछ । गगनजीको आजको कार्यक्रम तय भएको रहेछ । भोलि भए गगनजीले समय निकाल्छु भन्नुभयो,” केन्द्रीय सदस्य मधु आचार्यले भने, “हिजो साँझ अर्जुननरसिंह केसी दाइले दुई, तीन घण्टा राखेर संवाद गराउनुभएको हो ।” 

केसीको घरमा संवाद : तिक्ततामा अरू खेल्छन्, मिल्नुको विकल्प छैन 
बैठकमा समूहका नेता शेखर कोइराला र समूहबाट महामन्त्री जितेका गगन थापासहितको टिम एकताबद्ध भएर अघि नबढे समूह कमजोर हुने विषयमा छलफल भएको थियो ।

बैठकमा नेता अर्जुनरसिंह केसीले दुई बीचमा तिक्तता र असहमति जसरी भएपनि अहिले बाहिर आउन नहुनेमा जोड दिएका थिए । केसीकै घरमा बसेको बैठकमा मिलेर अघि बढ्ने सहमति भएको थियो । आफूहरू मिलेर अघि बढने अरुलाई फाइदा पुग्नेमा समूह निष्कर्षमा पुगेको केसी बताउँछन् ।

सोहीकारण आजका लागि बोलाइएको बैठक भोलिसम्मका लागि सारिएको उनको भनाइ छ । भोलिको बैठक बत्तिसपुतलीस्थित अनुपम फूडल्याण्डमा दिउँसो १ बजे बस्ने केन्द्रीय सदस्य आचार्यले जानकारी दिए ।