काठमाडौं । राप्रपा नेपालका अध्यक्ष कमल थापाले वर्तमान व्यवस्था असफल प्रमाणित भएको बताएका छन् । सोमबार काठमाडौंमा आयोजित उपत्यकास्तरीय कार्यकर्ता भेलामा उनले यस्तो बताएका हुन् ।

अध्यक्ष थापाले यो व्यवस्था असफल भएको भन्दै विकल्पमा नेपाली जनताको चाहनाअनुरूप राजासहितको हिन्दुराष्ट्र, सुशासन र आर्थिक समृद्धि कायम हुनुपर्ने माग गरे ।

उनले सहमति र सहकार्य गरेर यही संविधानबाट राजसंस्था र हिन्दुराष्ट्र पुनःस्थापना नगरिए आन्दोलन नै अन्तिम विकल्प रहेको जिकिर गरे ।

“राजासहितको प्रजातन्त्र र हिन्दुराष्ट्र स्थापना गर्न यदि राजनैतिक दलहरू तयार हुने हो भने, सहमत हुने हो भने अहिलेकै संविधानको परिधिभित्र रहेर सहमति र सहकार्यका आधारमा संविधानलाई संशोधन गरेर कायम गर्न सकिन्छ,” उनले भने, “यदि, सहमति र सहकार्य गरेर यही संविधानबाट राजसंस्था र हिन्दुराष्ट्र पुनः स्थापना नगर्ने हो भने आन्दोलन नै अन्तिम विकल्प हो ।” न्युज एजेन्सी नेपाल