काठमाडौं । नेकपा (एमाले)का नेता रघुवीर महासेठले आफूहरूको ‘संकल्पयात्रा’ नरोकिने बताएका छन् । बैतडीको झुलाघाटबाट सुरु संकल्पयात्रा पाँचथरको चिवाभञ्ज्याङमा पुगेर सकिनेछ ।

संकल्पयात्रालाई कोसी प्रदेशमा अवरोध गर्ने पहिचानवादी पक्षधरको चेतावनीप्रति लक्षित गर्दै उनले आफूहरू शान्तिपूर्ण तरिकाले अघि बढ्ने बताए ।

“एमालेलाई गाली गरेर, एमालेको कार्यकर्तामाथि ढुंगा हिर्काएर, एमालेको कार्यकर्तामाथि कुटपिट गरेर म पहिचान प्राप्त गर्छु – त्यो सोच्नु उहाँहरू गलत हुनुहुन्छ,” शनिबार विराटनगरमा आयोजित पत्रकार सम्मेलनमा उनले भने, “उहाँहरू वार्तामा आउनुपर्छ, छलफलमा आउनुपर्छ ।”

पहिचानवादीले पनि आफूहरूलाई सहयोग गर्नुपर्ने र नेपाल सरकारले अवरोध हुन दिन नहुनेमा उनले जोड दिए । “नेपाल सरकारले बाधा, अवरोध हटाउनुपर्छ । उहाँहरू (पहिचानवादी)ले हामीलाई सहयोग गर्नुपर्छ,” उनले भने ।

समृद्ध नेपाल र मध्यपहाडी क्षेत्रका जनतालाई सुखीसम्पन्न बनाउनका निम्ति संकल्पयात्रा गरिएको उनको भनाइ छ ।

एमाले स्थायी कमिटी सदस्य शेरधन राईले पनि आफूहरूको संकल्पयात्रामा अवरोध नगर्न पहिचानवादीलाई आग्रह गरे ।