प्यालेस्टाइनको गाजामा तत्काल युद्धविराम गर्न आह्वान गरिएको संयुक्त राष्ट्रसंघीय प्रस्तावलाई संयुक्त राज्य अमेरिकाले निषेधाधिकार (भिटो) प्रयोग गरेर निरस्त पारिदियो । गत बुधवार संयुक्त राष्ट्रसंघका महासचिव एन्टोनियो गुटेरेसले गाजामा मानवीय विपत्ति उत्पन्न भएकोप्रति राष्ट्रसंघको बडापत्रको धारा ९९ जारी गरेर सदस्य राष्ट्रहरूको ध्यानाकर्षण गराएका थिए । 

त्यसपछि बसेको संयुक्त राष्ट्र सुरक्षापरिषद्को बैठकमा गाजामा तत्काल युद्धविरामको आह्वान गर्दै राखिएको प्रस्तावविरुद्ध अमेरिकाले शुकवार भिटो प्रयोग गरेको थियो । अर्थात्, अमेरिका गाजामा भएको इजरायली फौजी कारबाही निरन्तरताका पक्षमा अमेरिका उभिन पुग्यो । त्यसबाट गैरसैनिक प्यालेस्टाइनी जनता झन् ठूलो मानवीय विपत्ति आइलागेको छ ।

तत्काल युद्धविराम गरेमा हमासको शक्ति क्षिण नहुने र फेरि पनि ७ अक्टोबरकै जस्तो आतङ्ककारी हमला हुनसक्ने भन्दै इजरायलले सैनिक कारबाही नरोकिने जनाएको छ । पक्कै पनि गैरसैनिक इजरायली नागरिकमाथि हमासले गरेको आक्रमण जघन्य अपराध थियो तर हमासलाई दण्ड दिन उसैका शैलीमा गैरसैनिक प्यालेस्टाइनी क्षेत्रमा बम बर्साउनु पनि उत्तिकै निन्दनीय कृत्य हो ।

सुरक्षापरिषद्को स्थायी सदस्यमध्येको अमेरिकाले भिटो प्रयोग गरे पनि बेलायत प्रस्तावमा हमासको निन्दा नगरिएको भन्दै मतदानमा अनुपस्थित रह्यो । फ्रान्स, चीन र रुसले प्रस्तावको समर्थन गरे । रुस र चीन सामान्यतः सधैँजस्तै अमेरिकाको विपक्षमा उभिए भने लोकतान्त्रिक खेमाकै फ्रान्स प्रस्तावको पक्षमा मत दिएर विश्वजनमतको साथमा रह्यो । 

प्रस्तावका पक्षमा बोल्दै संयुक्त राष्ट्र सुरक्षा परिषद्का लागि फ्रान्सका स्थायी प्रतिनिधिले महासचिव गुटेरेसको आह्वानको समर्थन गरे भने उनले विश्व समुदायले मानवीयता विरुद्धको ज्यादतीमा दोहोरो मापदण्ड अपनाउन नहुनेमा जोड दिए । अर्थात्, अन्तर्राष्ट्रिय राजनीतिमा प्रायः ओझेलमा रहने गरेको फ्रान्स यसपटक अन्तर्राष्ट्रिय समुदायको सही प्रतिनिधित्व गर्न पुग्यो । 

हमासको अपराधमा यसरी गाजा क्षेत्रका गैरसैनिक प्यालेस्टाइनीमाथि ज्यादती गर्दा इजरायलप्रतिको द्वेष झन् बढेर जाने निश्चित छ । हमास भन्ने संगठन इजरायली सैनिक कारबाहीमा समाप्त भयो भने नै पनि अहिले विनाअपराध अत्याचार सहन बाध्य प्यालेस्टाइनी युवामा जाग्ने प्रतिशोधको भावनाले अर्को कुनै संगठन जन्माउनेछ ।

यसै पनि हमासजस्तो गैरजिम्मेदार आतङ्ककारी संगठनकै हाराहारीमा इजरायल र अमेरिकासमेत ओर्लेर युद्धबाट समाधानको विकल्प खोज्नु निन्दनीय र दुःखद विडम्बना हो । यस्तो आदिम बर्बरताले मानव जातिकै इतिहासमा कलङ्कको अर्को अध्याय थप्नेमात्र हो । यसैले गाजामा तत्काल सैनिक कारबाही रोकेर इजरायलले मानवीय सहायता निर्बाध उपलब्ध गराउने वातावरण मिलाओस् । संयुक्त राज्य अमेरिकाले पनि विश्व जनमतको कदर गर्दै इजरायललाई गैरसैनिक नागरिकविरुद्ध सैनिक कारबाही रोक्न दबाब दिनुपर्छ ।