काठमाडौं । राष्ट्रिय मानवअधिकार आयोगमा दर्ता हुने उजुरीको संख्या पछिल्ला वर्षहरूमा घट्दो क्रममा छ । आर्थिक वर्ष २०७९/८० को गतिविधि समेटेर आयोगले सार्वजनिक गरेको २३ औं वार्षिक प्रतिवेदनमा पछिल्ला वर्षहरूमा उजुरी आउने क्रम घटेको देखिएको छ ।

प्रतिवेदनअनुसार आर्थिक वर्ष २०७९/८० मा आयोगमा १०० वटा उजुरी परेका थिए । अघिल्लो आर्थिक वर्ष २०७८/७९ मा आयोगमा १०१ वटा उजुरी परेका थिए । आर्थिक वर्ष २०७७/७८ मा आयोगमा १८६ वटा उजुरी परेको प्रतिवेदनमा उल्लेख छ । यी उजुरीहरू केन्द्र, सात प्रदेश र तीन प्रदेश शाखा कार्यालयमा दर्ता भएका हुन् ।
 
गत आर्थिक वर्ष परेका उजुरीमध्ये सबैभन्दा बढी नागरिक तथा राजनीतिक अधिकारको उल्लङ्घनसँग सम्बन्धित छन् । 

प्रतिवेदनअनुसार गत वर्ष नागरिक तथा राजनीतिक अधिकारको उल्लङ्घनसँग सम्बन्धित ४७, आर्थिक तथा सामाजिक अधिकारको हनन् भएको भनी नौवटा उजुरी परेका थिए ।

यातनाविरुद्धको अधिकार १३, बाल अधिकारको हनन् ११ र महिला अधिकारको हनन् सम्बन्धी नौवटा उजुरी परेका थिए । 

अपांगता भएका व्यक्तिको अधिकारको उल्लंघन चार, जातीय विभेदविरुद्धको अधिकार दुई, आदिवासी जनजातिको अधिकारसम्बन्धी दुई र व्यक्ति बेपत्ताविरुद्धको अधिकार, वातावरणको अधिकार र ज्येष्ठ नागरिकको अधिकारसम्बन्धी १/१ र अन्य २ उजुरी गत आर्थिक वर्ष दर्ता भएको प्रतिवेदनमा उल्लेख छ ।

गत आर्थिक वर्ष आप्रवासी श्रमिकको अधिकार हनन् भएको भनेर कुनै पनि उजुरी नपरेको प्रतिवेदनमा जनाइएको छ ।