काठमाडौं । सत्तारुढ नेकपा (माओवादी केन्द्र)को विधान सम्मेलनको मिति धकेलिएको छ ।

गएको साउनमा बसेको केन्द्रीय समिति बैठकले भदौ १६ गतेबाट तीनमहिने अभियान चलाउने र मंसिरमा पार्टीको विधान सम्मेलन गर्ने निर्णय गरेको थियो । तर, पार्टी सुदृढीकरण अभियानको समयावधि चार महिना अर्थात पुस १६ गतेसम्म लम्बाइएकाले विधान सम्मेलन पर सरेको हो ।

पार्टीका कोषाध्यक्ष तथा केन्द्रीय कार्यालयका मुख्य सचिव श्रीराम ढकालका अनुसार विधान सम्मेलनको मिति पार्टीको अभियान सकिएपछि बस्ने केन्द्रीय समितिको बैठकले निर्धारण गर्ने बताए ।

“पुस १६ गतेसम्म त विशेष अभियान नै सञ्चालन हुनेछ । त्यसको समीक्षा गर्न केन्द्रीय समिति बैठक बस्छ । सोही बैठकले विधान सम्मेलनको मिति तोक्नेछ,” उनी भन्छन् ।

माओवादीले भदौ १६ गतेबाट पार्टी रूपान्तरणको विशेष अभियान चलाएको छ । घरघरमा पुगेर जनताका समस्या सुन्ने काम भइरहेको नेताहरू बताउँछन् ।

पार्टीका सचिव दीनानाथ शर्मा भने फागुनभित्रै विधान सम्मेलन हुने बताउँछन् ।

“अभियानको समीक्षा बैठकले विधान सम्मेलनको मिति तोक्नेछ,” उनी भन्छन्, “हामीले विधान सम्मेलनका लागि धेरै समय नलिने भनेका छौँ । सम्भवतः फागुनभित्रै विधान सम्मेलन हुन्छ ।”

विधान सम्मेलनको केही समयपछि नै पार्टीको विशेष महाधिवेशन गर्ने तयारी गरेको छ । अब बस्ने केन्द्रीय समिति बैठकले महाधिवेशनको तयारीका लागि समिति गठन गर्ने शर्माले बताए ।

एकता संयोजन समिति बन्छ ?
पूर्वप्रधानमन्त्री डा. बाबुराम भट्टराई नेतृत्वको नेपाल समाजवादी पार्टीले माओवादीसँग एकताका लागि संयोजन समिति बनाइसकेको छ । माओवादीले पनि छिट्टै संयोजन समिति बनाउने नेताहरू बताउँछन् ।

पार्टीको विधान सम्मेलन, एकताको विषयबारे छलफल गर्न छिट्टै पदाधिकारी बैठक बस्ने तयारी भइरहेको ढकालले जानकारी दिए ।

“हामी छिट्टै पदाधिकारी बैठक बस्दैछौँ । यी विभिन्न विषयमा छलफल हुनेछ,” उनले भने ।

पदाधिकारी बैठकको मिति भने तोकिसकेको छैन । माओवादीमा आगामी महाधिवेशनलाई एकताको महाधिवेशन बनाउनुपर्ने बहस पनि सुरु हुन लागेको नेताहरू बताउँछन् ।